Pry vyratavańni piłota ŭ Iranie CRU vykarystała sakretny instrumient «Pryvidny šept». Jon łović samyja słabyja sihnały čałaviečaha arhanizma

Hetaja technałohija, jak paviedamlajecca, vykarystoŭvaje kvantavuju mahnitamietryju dalokaha dziejańnia dla vyjaŭleńnia elektramahnitnaha adbitka sercabićcia čałavieka i supastaŭlaje hetyja danyja z prahramnym zabieśpiačeńniem na asnovie štučnaha intelektu dla vydzialeńnia hetaha adbitka na fonie šumu.

Adznačajecca, što nazva vybrana nievypadkova. Murmur — heta miedycynski termin, jaki abaznačaje sardečny rytm, a Ghost aznačaje pošuk čałavieka, jaki «pa sutnaści źnik», patłumačyŭ adzin z surazmoŭcaŭ žurnalistaŭ. Pry hetym nieviadoma, ci maje pryłada dadatkovaje nastupalnaje prymianieńnie ŭ vajennych umovach.

«Pryvidny šept» byŭ prymienieny ŭ palavych umovach upieršyniu. Jak adznačaje NYP, na heta na bryfinhu namiaknuli prezident ZŠA Donald Tramp i dyrektar CRU Džon Retklif.

«Heta jak pačuć hołas na stadyjonie, tolki stadyjon — heta tysiača kvadratnych milaŭ pustyni. Pry adpaviednych umovach, kali vaša serca bjecca, my vas znojdziem», — raskazaŭ The New York Post surazmoŭca, znajomy z prahramaj.

Pavodle źviestak NYP, pryłada pad nazvaj Ghost Murmur była raspracavana ŭ sakretnym padraździaleńni Skunk Works kampanii Lockheed Martin, jakaja zajmajecca aerakaśmičnymi i vajskovymi technałohijami.

Sistemu ŭžo vyprabavali na viertalotach Black Hawk, a ŭ budučyni jaje mohuć vykarystoŭvać i na źniščalnikach F-35. Pieršyja vyprabavańni pravodzilisia ŭ pustynnaj miascovaści Irana, bo tam amal niama elektramahnitnych pieraškod, što stvaraje idealnyja ŭmovy dla takich technałohij.

Paviedamlajecca, što pryłada zdolnaja ŭłoŭlivać vielmi słabyja sihnały čałaviečaha arhanizma — nastolki słabyja, što raniej ich možna było zafiksavać tolki ŭ łabaratornych umovach. Ale dziakujučy sučasnym raspracoŭkam, u pryvatnaści kvantavym mahnitamietram i śpiecyjalnym datčykam na asnovie sintetyčnych ałmazaŭ, stała mahčymym vyjaŭlać hetyja sihnały na značnaj adlehłaści.

Hetaja technałohija syhrała klučavuju rolu padčas apieracyi pa pošuku źbitaha piłota: ź jaje dapamohaj udałosia prykładna vyznačyć jaho miescaznachodžańnie. Dalej dla dakładnaha vyznačeńnia vykarystoŭvaŭsia avaryjny majak, i razam hetyja sistemy dazvolili znajści čałavieka.

Pradstaŭniki ZŠA adznačajuć, što ŭ apieracyi vykarystoŭvalisia ŭnikalnyja technałohii, jakich niama ŭ inšych śpiecsłužbaŭ. Samu apieracyju paraŭnoŭvajuć z pošukam adnoj piasčynki ŭ pustyni.

Pavodle zajavaŭ Donalda Trampa, heta była adna z samych śmiełych vyratavalnych apieracyj u historyi ZŠA. U joj udzielničali dziasiatki samalotaŭ i śpiecyjalnyja padraździaleńni, a sama apieracyja pravodziłasia z pavietranym prykryćciom.

• 11
• 0
• 2
• 2
• 2
• 0
• 0
• 0