Čamu mužčyn tryhieryć «žanočaja piŭnaja» i abaniemienty z ulikam mienstruacyi? Pra što havorać u šou Mientusavaj i Rajeckaj
Pakul u krainie źvierchu prydumali Hod biełaruskaj žančyny, biełaruski rašyli raskazać, što ich nasamreč chvaluje. U efir viarnułasia šou «Žančyny ciažkich pavodzinaŭ». Kaciaryna Rajeckaja, Maryna Mientusava i Nastaśsia Karasiova znoŭ sabralisia razam, kab abmierkavać roznyja prablemy: ad ahresiŭnych mužčynskich kamientaryjaŭ u internecie da depresii i hvałtu. I što rabić z mužčynami, jakija nie płaciać alimienty.
Farmat novaha siezona žanočaha šou prosty: viadoŭcy čytajuć ananimnyja pytańni ad biełarusak i adkazvajuć na ich.
Što nasamreč patrebna biełaruskam u Hod biełaruskaj žančyny
Pačynajuć z abvieščanaha Łukašenkam Hoda biełaruskaj žančyny.
Viadoŭcy zadajucca prostym pytańniem: što kankretna zrabili ŭłady dla žančyn? Zvolnili adzinuju žančynu-ministarku, zabaranili aborty ŭ pryvatnych klinikach, pakinuli za kratami sotni palitźniavolenych žančyn.
«Spačatku ty zabivaješ bołt na svoj elektarat, a žančyn — bolš za pałovu nasielnictva. A potym pačynaješ razumieć, što nie prosta tak byli žanočyja maršy. Hetyja zalacańni praz šeść hadoŭ — heta davoli zabaŭna. Ale heta lepš, čym Hod ruskaj movy, naprykład», — kaža Kaciaryna Rajeckaja.
Razmova chutka sychodzić z uzroŭniu łozunhaŭ na ŭzrovień bazavych patrebaŭ — zakon pra chatni hvałt, vyzvaleńnie žančyn-palitviaźniaŭ.
«Chacia b kab dziaržava skazała: «My suprać hvałtu». A nie kali jany na ŭsich uzroŭniach za hvałt», — farmuluje Maryna Mientusava.
Viadoŭcy zakranuli taksama temu alimientaŭ i chto płacić, kali mužčyna źnik z žyćcia dziciaci. U takoj situacyi, razvažajuć, moh by dapamahčy alimientny fond: dziaržava pakryvaje vydatki na dzicia, a ŭžo potym sama vybivaje hrošy z daŭžnika.
«Jak dziaržava biehaje za ekstremistami, adčajna i luta. Ale jana mahła b pieraklučyć svoj fokus», — zaŭvažaje Kaciaryna Rajeckaja.
Čamu mužčyn tryhieryć «žanočaja piŭnaja»
Haračymi temami dla abmierkavańnia stali adkryćcio piŭnoj «tolki dla žančyn» i ŭviadzieńnie fitnes-abaniemientaŭ z ulikam mienstrualnaha cykła. U sacsietkach hetyja inicyjatyvy vyklikali škvał ahresiŭnych kamientaroŭ z boku mužčyn.
Na dumku viadoŭcaŭ, heta prykład taho, jak u biełaruskim hramadstvie ŭsprymajucca žanočyja miežy, žanočaje cieła i samo prava žančyny na asobnuju prastoru, dzie možna pačuvać siabie biaśpiečna.
«Niekatoryja mužčyny pačali pisać pra toje, što jany buduć śpiecyjalna prychodzić da hetaj piŭnoj i sprabavać tudy ci ŭvajści, ci padpilnoŭvać dziaŭčat, jakija adtul buduć vychodzić, — kaža Maryna Mientusava i dadaje:
— Adna piŭnaja tolki dla žančyn, adna-adzinaja. I my nie zabirajem pamiaškańnie ŭ mužčynskaj piŭnoj, nichto vas nie dyskryminuje. Advalicie!»
Što da abaniemienta ŭ zału, to žančyny chočuć, kab ich fizijałohiju ŭličvali.
«Pahladzicie roliki pra mužčyn, jakija nibyta adčuvajuć mienstrualny bol. Im na puzika klejać detektary, i jany ničoha nie mohuć zrabić, pa domie chodziać i stohnuć: «Ja nie mahu navat ruku padniać». A my pry hetym režymy źviarhajem. Nu, ci amal źviarhajem. Robim usio toje ž samaje, ściakajučy kryvioj», — kamientuje Maryna Mientusava.
«Mužčynam stała narmalna paraŭnoŭvać žančyn z kalekami ci žyviołami praz kosku, i ŭsio tamu, što im nie dazvolili padoŭžyć abaniemient na tyja ž piać dzion», — kaža Rajeckaja.
Invientaryzacyja padtrymki
Častka vypusku była pryśviečana psichałahičnamu stanu.
Nastaśsia Karasiova adkryta raspaviała pra svoj dośvied ciažkaj depresii, jakuju nie vytrymali navat jaje tahačasnyja adnosiny. «Nu a ty doŭha jašče budzieš u takim stanie?» — takaja reakcyja, ź jakoj davodzicca sutykacca z boku, zdavałasia b, blizkaha čałavieka.
«Mnie zdajecca, što ja sama sabie bolš za ŭsich dapamahła. Bo nichto akramia nas nie dapamoža sabie lepš, čym my sami», — zaŭvažaje Karasiova.
Razam z hetym jana kaža i pra važnaść pravilna padabranych antydepresantaŭ, i pra kaleh, jakija ŭvajšli ŭ jaje stan i razhruzili jaje na pracy.
Mientusava ŭ adkaz prapanuje nie abstraktnuju «luboŭ da siabie», a vielmi kankretny padychod — «invientaryzacyju padtrymki»: sieści i vypisać, chto i ŭ čym sapraŭdy moža być tabie aporaj. Chto moža prosta vysłuchać, chto dapamoža pa pracy, chto daść «pinok», a chto dazvolić tabie być słabaj.
«Časam nam nie treba, kab nas šturchali. Časam treba, kab nam dazvolili pabyć «anučaj» i pryniali nas u hetym stanie», — kaža Maryna Mientusava.
Što dalej
Hałoŭnaja misija abnoŭlenaha šou — padśviatlać ekśpiertnyja žanočyja hałasy. U płanach viadoŭcaŭ zaprasić da razmovy nie tolki palityčnych lidarak, jak Śviatłana Cichanoŭskaja ci Maryja Kaleśnikava, ale i ekśpiertak z roznych śfier. Heta i Hanna Samarskaja (Women in Tech), i piśmieńnica Jeva Viežnaviec, i spartsmienka Alaksandra Hierasimienia, i śpiavačka Hanna Šarkunova.
Ciapier čytajuć
Maksim Znak: My ź Cichanoŭskaj zajšli padavać skarhu ŭ kabiniet Jarmošynaj — ale Jarmošynaj tam nie było57
Kamientary
Ŭiaŭlaju, jaki by pikišavali žančyny, kali b adkryli niejkaje zaviedzieńnie, vyklučna dla mužčyn)
Na žal toje ci zakanamierna, ale abliččča sučasnaha, daŭno vyradziŭšahasia, fieminizmu (idejałohii, prama skažam, raźličanaj nie na najrazumniejšych asob) siońnia całkam vyznačajecca levakami.
Tamu lubyja jaho ŭvasableńni i znaki ŭ realnym žyćci "tryhierać" mianie taksama.
Pryblizna tak, jak nośbity vošaŭ nie pierajmalisia b ich vyviadzieńniem, a abjaŭlali b heta novaj normaj, hurtavalisia b u supołki i ładzili b schodki ŭ ludnych miescach. Albo jak demanstracyi pad čyrvonymi fłahami. Nu, vy zrazumieli.
Mo spačatku varta niešta zrabić z žančynami što ličać što dzieci abaviazanyja žyci z mamaj bo "heta ž mama"? A baćka tut prosta krynica finansavańnia chaciełak mamy? Mo spačatku ŭzakonić pražyvańnie dziaciej 50 na 50 pa zmoŭčvańni?