Mahiloŭskija studenty zrabili adkryćcio, raźbirajučy daŭniuju archieałahičnuju kalekcyju
U Biełarusi archieołahi znajšli niezvyčajny kremnievy artefakt epochi niealitu, jaki, mahčyma, źjaŭlajecca staražytnaj antrapamorfnaj fihurkaj čałavieka, piša Times.by.
Adkryćcio zrabili studenty Mahiloŭskaha dziaržaŭnaha ŭniviersiteta imia Kulašova, kali vyvučali kalekcyju artefaktaŭ historyka Viačasłava Kapycina. Asablivuju ŭvahu daśledčykaŭ pryciahnuŭ kamień niezvyčajnaj formy, znojdzieny raniej na stajancy Daŭžanka-2 na pravym bierazie raki Druć.
Kiraŭnik Centra pieršabytnaj archieałohii Alaksandr Kołasaŭ pryjšoŭ da vysnovy, što heta nie prosta pryłada pracy, jak mierkavałasia raniej, a śpiecyjalna apracavanaja fihurka čałavieka, vyrablenaja z šeraha krejdavaha kremieniu ŭ V—III tysiačahodździach da našaj ery.
Na artefakcie možna razhledzieć elemienty, jakija nahadvajuć hałavu, tułava, ruki i nohi. Daśledčyk adznačaje, što ŭ niealicie mnohija pradmiety mahli adnačasova vykonvać praktyčnyja i rytualnyja funkcyi.
Zaraz znachodka znachodzicca ŭ Instytucie historyi materyjalnaj kultury Rasijskaj akademii navuk u Sankt-Pieciarburhu, dzie śpiecyjalisty praviaduć dadatkovyja daśledavańni. Jany pavinny dapamahčy vyznačyć sapraŭdnaje pryznačeńnie artefakta i sposab jaho vykarystańnia.
Kali navukoŭcy paćvierdziać, što heta sapraŭdy antrapamorfnaja fihurka, to jana stanie pieršaj padobnaj znachodkaj na terytoryi biełaruskaha Padniaproŭja. Pa słovach Alaksandra Kołasava, padobnyja vyjavy čałavieka ŭžo viadomyja ŭ materyjałach niealityčnaj epochi lasnoj zony Uschodniaj Jeŭropy.
Kamientary