U Litvie sacyjał-demakraty vyklučyli pravapapulisckuju «Zaru nad Niomanam» z kaalicyi
Staršynia Litoŭskaj sacyjał-demakratyčnaj partyi Mindaŭhas Sinkiavičus aficyjna prapanavaŭ partyi spynić udzieł u kiroŭnaj kaalicyi razam z pravapapulisckaj «Zaroj nad Niomanam» i pačać pieramovy ab farmiravańni novaj kiroŭnaj bolšaści z Sajuzam demakrataŭ «U imia Litvy», piša LRT.
U subotu ŭ Vilni adbylisia pasiadžeńni prezidyuma i savieta ŁSDP. Hałoŭnaj temaj stała mahčymaja źmiena kanfihuracyi kiroŭnaj kaalicyi i inšyja źmieny va ŭradzie.
Nie tolki palityčnyja apanienty, ale i častka samich sacyjał-demakrataŭ z samaha pačatku sajuza zadavalisia pytańniem, ci varta partyi zastavacca ŭ kaalicyi z «Zaroj nad Niomanam», jakuju ŭznačalvaje Remihijus Žamajtajcis. Na hetym tydni Sinkiavičus zajaŭlaŭ, što razhladaje try scenary, jakija maje namier pradstavić radzie partyi.
Pavodle nieaficyjnaj infarmacyi, siarod ich mahła być nie tolki zamiena ministraŭ, ale i źmiena premjer-ministra Inhi Ruhinienie. Adnak nieviadoma, kali mienavita takija źmieny mahli b adbycca, bo leta i zaviaršeńnie parłamienckaj siesii ličacca nie samym prydatnym časam dla kadravych pierastanovak.
Na pytańnie pra mahčymaha novaha premjer-ministra Sinkiavičus koratka adkazaŭ: «Dakładna nie». Hanarovaja staršynia partyi Vilija Blinkiavičucie zajaviła tolki, što partyja «hatovaja da ŭsiaho». Na ŭdakładnialnaje pytańnie pra novaha premjera jana nie adkazała.
Paśla parłamienckich vybaraŭ 2024 hoda sacyjał-demakraty sfarmiravali kiroŭnuju kaalicyju razam z «Zaroj nad Niomanam» i Sajuzam demakrataŭ «U imia Litvy». Adnak vosieńniu demakrataŭ u kaalicyi zamianiła parłamienckaja frakcyja Sajuz sialan, zialonych i chryścijanskich siemjaŭ Litvy. Ciapier kaalicyja maje 80 miescaŭ u Siejmie.
Pravapapulisckuju partyju «Zara nad Niomanam» Remihijus Žamajtajcis zasnavaŭ u listapadzie 2023 hoda. Na apošnich parłamienckich vybarach jana dabiłasia vialikaha pośpiechu, atrymaŭšy kala 15% hałasoŭ vybarščykaŭ i pravioŭšy ŭ Siejm 19 deputataŭ sa 141. Heta byŭ treci vynik z usich palityčnych siłaŭ, i sacyjał-demakraty, jakija pieramahli na vybarach, byli vymušanyja zaprasić partyju va ŭradavuju kaalicyju».
Žamajtajcis raniej nieadnarazova traplaŭ u skandały, źviazanyja ź jahonymi vykazvańniami, jakija traktavalisia jak antysiemickija, taksama jon nievyrazna vykazvaŭsia adnosna anieksii Rasijaj Kryma. U intervju, uziatym letaś niezadoŭha da vybaraŭ, jon stanoŭča vykazvaŭsia adnosna pierśpiektyŭ adnaŭleńnia ekanamičnaha supracoŭnictva ź Biełaruśsiu.
U Litvie časta apošnim časam prachodili akcyi suprać «Zary nad Niomanam» va ŭradzie i, u pryvatnaści, suprać addavańnia im pasady ŭ Minkultury.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary