«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie
Pryčyny nazyvajuć roznyja.
Biełarus, jaki dapamahaje stryječnamu bratu z Rasii znajści kvateru ŭ Hrodnie na praciahły termin, sutyknuŭsia z tatalnym niežadańniem hrodziencaŭ zdavać žytło rasijanam.
«Što naohuł adbyvajecca z arendaj žylla ŭ RB dla zamiežnych hramadzian (RF)? Ja adhuknuŭsia na 95% abjaŭ Hrodna, i ŭsie admovili», — napisaŭ mužčyna ŭ Treds.
U arendzie žytła rasijanam admaŭlajuć. Pryčyny nazyvajuć roznyja
Adzin z kamientataraŭ tłumačyć heta tym, što zdać žytło zamiežniku pa damovie aznačaje zdabyć masu prablem. Naprykład, z vypłataj padatku, kali hety arandatar vyrašyć źjechać, nie papiaredziŭšy.
«Vy pavinny budziecie ŭ sudzie dakazvać, što ŭ vašaj kvatery nichto nie žyvie. I ŭsie hetyja miesiacy, pakul niejkim niejmaviernym sposabam nie dakažacie, vy budziecie płacić padatak i nie zmožacie zdać inšym ludziam. A biez damovy na słovie sumleńnia zdavać — naohuł nie varyjant», — tłumačyć adzin z kamientataraŭ.
«Im treba abaviazkova rehistravać zdaču žylla zamiežnym hramadzianam. Nie chočuć zamaročvacca», — dadaje inšy.
Na što aŭtar dopisu adkazaŭ, što tolki siońnia adpraviŭ zajaŭki na bolš za 50 kvater i bolšaść usprymaje rehistracyju jak upisvańnie nieviadomaha čałavieka ŭ svaju ŭłasnaść, tamu i admaŭlajucca.
«Chtości prosta pa čutkach nie choča zdavać naohuł. Pašpartysty ŭ cełym rajać nie źviazvacca z RF», — piša jon.
Jašče adzin kamientatar dzielicca, što ŭ milicyi nie rajać źviazvacca z rasijanami, nibyta kažuć, što lepš zasialać vjetnamcaŭ ci kitajcaŭ, bo ź imi mienš prablem.
Rasijanie sami vinavatyja, što ich niedalublivajuć?
Pry hetym mnohija adznačajuć, što niežadańnie zdavać žytło rasijanam moža być vyklikana nie tolki biurakratyčnymi pytańniami.
«U Hrodnie nie lubiać ruskich. Voś i ŭvieś adkaz», — hučyć adzin z samych załajkanych kamientaroŭ.
«Zaŭsiody viedaŭ, što ŭ Hrodnie žyvuć samyja vydatnyja ludzi, tak trymać! My, minčuki, nie takija», — iranizuje inšy.
«Aj małajcy ziemlaki, hanarusia», — piša mužčyna.
Jość i tyja, chto ličyć, što rasijanie sami vinavatyja ŭ situacyi, jakaja skłałasia.
«Tak adbyvajecca, tamu što vielmi mnohija rasijanie pavodziać siabie ŭ krainie vielmi drenna i zasłužyli sabie strašennuju reputacyju», — napisała žančyna.
Pry hetym znajšłasia žančyna, jakaja šmat hadoŭ zdaje kvateru rasijaninu i nie maje z hetym prablem.
«Zdaju kvateru mužčynu z Kazani ŭžo bolš za 7 hadoŭ, usio pa damovie i zakonie, nijakich prablem niama», — napisała jana i dadała, što abaviazkova treba rabić rehistracyju ŭ ŽESie z afarmleńniem damovy, a zatym rehistracyju ŭ milicyi va ŭčastkovaha i vypłačvać padatak.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie6
Kamientary
«V dierievniu, k tietkie, v hłuš, v Saratov»
[Red. Vydalena]
[Zredahavana]
[Zredahavana]