Jak paviedamlaje rasśledavalnicki prajekt Vsquare, u ZŠA razhladajuć mahčymaść pryznačeńnia byłoha premjer-ministra Vienhryi Viktara Orbana na vysokuju pasadu ŭ Arhanizacyi Abjadnanych Nacyj, što moža zabiaśpiečyć jamu dypłamatyčny imunitet i abaronu ad sudovaha pieraśledu na radzimie, piša «Jeŭrapiejskaja praŭda».
Jak śćviardžajecca, takuju ideju abmiarkoŭvajuć u asiarodździ MAGA-kryła Respublikanskaj partyi ZŠA. Pra heta Vsquare paviedamlaje sa spasyłkaj na zamiežnyja i vienhierskija krynicy.
Zhodna z kanviencyjaj AAN 1946 hoda, poŭnym dypłamatyčnym imunitetam karystajucca hienieralny sakratar arhanizacyi, jaho namieśniki i pamočniki. Hety imunitet faktyčna abaraniaje ich ad lubych sudovych pieraśledaŭ, uklučajučy kryminalnyja, i raspaŭsiudžvajecca taksama na členaŭ siamji.
Kiraŭniki śpiecyjalizavanych ustanoŭ AAN taksama majuć imunitet, ale ŭ bolš abmiežavanym vyhladzie — tolki adnosna dziejańniaŭ, źviazanych z vykanańniem słužbovych abaviazkaŭ.
Akramia mahčymaj padtrymki z boku ZŠA, Orban moža raźličvać u hetaj spravie i na prezidenta Arhienciny Chaŭjera Mileja. Jaho pazicyja važnaja ŭ kantekście baraćby za pasadu nastupnaha hienieralnaha sakratara AAN, dzie adnym z favarytaŭ ciapier ličycca blizki da Mileja arhienciniec Rafael Hrosi, jaki ciapier uznačalvaje MAHATE.
Pasada ŭ AAN taksama dała b Orbanu mahčymaść pracavać u Ńju-Jorku. Pavodle infarmacyi, letam jon płanuje pajezdku ŭ ZŠA na čempijanat śvietu pa futbole, a jaho dačka i ziać užo kala hoda žyvuć u hetaj krainie. U vypadku paharšeńnia palityčnaj situacyi ŭ Budapiešcie jon moh by dziela pracy zastacca ŭ ZŠA na bolš praciahły čas, nie źviartajučysia pa palityčny prytułak.
Sam Orban u adkaz na pytańni žurnalistaŭ na hety kont zajaviŭ, što nie baicca mahčymych sudovych razhladaŭ i śćviardžaje, što zaŭsiody dziejničaŭ u miežach zakona.
Raniej ciapierašni premjer-ministr Vienhryi Pieter Madźjar zajaŭlaŭ, što źviazanyja z Orbanam aliharchi vyvodziać značnyja srodki za miažu i mohuć rychtavacca da ŭciokaŭ. Taksama hučali mierkavańni, što Orban zahadzia šukaje mahčymaść atrymać prytułak u ZŠA na vypadak pahrozy kryminalnaha pieraśledu.
Kamientary