Sabaki suprać katoŭ: psichołahi vyśvietlili, chto ź ich bolš uźnimaje nastroj, a chto moža psichałahična naškodzić haspadaru

Ideja pra toje, što žyvioły lečać niervy — vielmi papularnaja. Adnak navukoŭcy ź Niderłandaŭ i Bielhii vyrašyli pravieryć hetaje pierakanańnie nie ŭ łabaratornych umovach, a ŭ realnym žyćci. Vyniki ich daśledavańnia, apublikavanaha ŭ aŭtarytetnym časopisie Frontiers in Psychology, pieravaročvajuć našy ŭjaŭleńni.

Kab atrymać maksimalna dakładnyja źviestki, daśledčyki admovilisia ad tradycyjnych apytańniaŭ, dzie ludziej prosiać uzhadać minułaje. Zamiest hetaha jany ŭstanavili na smartfony 188 uładalnikaŭ sabak i katoŭ admysłovuju prahramu.

Na praciahu piaci dzion prahrama da 10 razoŭ na sutki raptoŭna prasiła ŭdzielnikaŭ adznačyć svoj nastroj, uzrovień stresu i toje, ci ŭzajemadziejničajuć jany ŭ hety momant sa svaim hadavancam. Taki padychod dazvoliŭ sabrać amal 8 000 spravazdač u režymie realnaha času i adsačyć sapraŭdnyja, a nie prydumanyja emocyi.

Spačatku vyniki paćvierdzili toje, što my i tak viedali: katy i sabaki sapraŭdy zdolnyja palapšać nastroj. Kali ludzi prosta bavili čas sa svaimi žyviołami ŭ zvyčajnaj abstanoŭcy, ich stanoŭčyja emocyi raśli, a niehatyŭnyja — źnižalisia.

Pryčym, nasupierak papularnamu stereatypu pra bolšuju sacyjalnaść i emacyjnaść sabak, pradstaŭniki abodvuch vidaŭ prynosili adnolkavuju radaść svaim haspadaram.

Ale ŭsia hetaja idylija kardynalna źmianiłasia, kali havorka zajšła pra reakcyju ludziej na stresavyja padziei.

Vyśvietliłasia, što ni sabaki, ni katy nasamreč nie pracujuć jak «ščyt ad stresu». Kali čałaviek sutykaŭsia ź niepryjemnaściami, aktyŭnaje ŭzajemadziejańnie z žyviołaj nijak nie źmiakčała emacyjny ŭdar.

Bolš za toje, navukoŭcy vyjavili vielmi niečakany kaciny paradoks: čym bolš ludzi ŭzajemadziejničali sa svaim katom mienavita padčas stresavaj situacyi, tym macniejšymi stanavilisia ich niehatyŭnyja emocyi. Uzajemadziejańnie z katami nie prosta nie dapamahała, jano litaralna ŭzmacniała tryvohu i stres, chacia siarod uładalnikaŭ sabak takoj tendencyi nie nazirałasia zusim.

Čamu ž tak adbyvajecca? Daśledčyki miarkujuć, što ŭsia sprava ŭ roznych stylach pavodzinaŭ. Katy zvyčajna nienaviaźliva znachodziacca ŭ chacie, što vydatna pasuje dla zvyčajnaha dnia. Ale heta moža zusim nie adpaviadać tamu ŭzroŭniu padtrymki, jaki patrabujecca čałavieku ŭ stanie vostraha stresu.

U psichałohii heta nazyvajecca «paharšeńniem ad padtrymki» (support deterioration) — kali dapamoha nie adpaviadaje situacyi, jana pačynaje razdražniać i tolki paharšaje stan.

Tamu nastupny raz, kali ŭ vas zdarycca vielmi kiepski dzień, mahčyma, lepš dać katu spakojna paspać u kucie i raźbiracca samastojna, a nie čakać ad jaho chutkaha antystresavaha efiektu.

• 7
• 1
• 3
• 1
• 1
• 0
• 0
• 0