U Ńju-Jorku para zalezła na retranślacyjnuju viežu chmaračosa dziela zaručyn
U Ńju-Jorku dvoje ludziej uźnialisia na samuju viaršyniu chmaračosa «Empajr-stejt-biłdynh», dzie raźmieščana radyjo– i televizijnaja retranślacyjnaja vieža. Padčas niebiaśpiečnaha ŭzychodžańnia jany razharnuli banier z nadpisam: «Kali siła kachańnia pieramoža luboŭ da ŭłady, u śviecie nastanie mir». Paśla hetaha mužčyna zrabiŭ svajoj spadarožnicy prapanovu ruki i serca, paviedamlaje CBS News.
Incydent adbyŭsia niedzie apoŭdni. Vidavočcy raskazali, što spačatku nie padazravali ničoha niezvyčajnaha, bo mierkavali, što maładyja ludzi majuć dazvoł znachodzicca na viežy. Adnak paźniej naziralnuju placoŭku evakujavali, a na miesca prybyli supracoŭniki palicyi, u tym liku śpiecyjalnyja padraździaleńni i palicejski viertalot.
Pavodle papiaredniaj infarmacyi, udzielniki akcyi padymalisia na samy vierch bieź śpiecyjalnaha strachavalnaha abstalavańnia i padčas znachodžańnia na viaršyni viali tranślacyju abo raźmiaščali paviedamleńni ŭ sacyjalnych sietkach. Spačatku jany pačali spuskacca, ale zatym znoŭ padnialisia na vierchniuju placoŭku.
Kala 12:35 para kančatkova pačała spusk. Na adnoj ź nižejšych placovak mužčyna staŭ na adno kalena i, jak vidać na kadrach, zrabiŭ prapanovu svajoj spadarožnicy. Paśla hetaha jany abnialisia, žančyna źniała masku, i para pacałavałasia.
Kala pieršaj hadziny dnia abodvuch zatrymali supracoŭniki palicyi. Paviedamlajecca, što nichto nie paciarpieŭ. Pavodle infarmacyi pravaachoŭnikaŭ, mužčynu i žančynie mohuć być vystaŭlenyja abvinavačańni ŭ niezakonnym praniknieńni na zakrytuju terytoryju i stvareńni niebiaśpiečnaj situacyi.
Pradstaŭnik administracyi «Empajr-stejt-biłdynh» paviedamiŭ, što incydent byŭ chutka ŭrehulavany sumiesna z palicyjaj. Pavodle jaho słoŭ, niebiaśpieki dla supracoŭnikaŭ, arandataraŭ i naviedvalnikaŭ budynka nie ŭźnikała. Pry hetym jon z humaram zaŭvažyŭ, što dla zapaminalnaj prapanovy šlubu naziralnaja placoŭka chmaračosa značna bolš biaśpiečnaje miesca, čym retranślacyjnaja vieža.
Śpiecyjalisty adznačyli, što padniaćcie na takuju vyšyniu biez padrychtoŭki vielmi niebiaśpiečnaje. Na viežy pracuje radyjotechničnaje abstalavańnie, znachodziacca krynicy elektraenierhii, a lubaja pamyłka moža pryvieści da ciažkich nastupstvaŭ. Takija raboty, jak padkreślivajuć ekśpierty, vykonvajuć tolki śpiecyjalna navučanyja ludzi.
Heta nie pieršy vypadak, kali ludzi padymalisia na viaršyniu «Empajr-stejt-biłdynh». U 2023 hodzie taki padjom ździejśniŭ muzykant i akcior Džared Leta, adnak jon rabiŭ heta z aficyjnaha dazvołu administracyi budynka.
Vierchni pavierch Empajr-stejt-biłdynh znachodzicca na vyšyni 381 mietr. Kali ŭličvać retranślacyjnuju viežu, to vyšynia budynka składaje 443,2 mietra. Hety kultavy budynak uvachodzić u top-10 samych vysokich u ZŠA.
Viecier na samym viersie budynka ŭ toj čas, jak heta adbyvałasia, byŭ paŭdniova-zachodnim, z chutkaściu 8‑16 kiłamietraŭ za hadzinu, a tempieratura pavietra, pakul para znachodziłasia naviersie, składała 31,7 hradusa.
U Piekinie samalot urezaŭsia ŭ samy vysoki chmaračos
«Takoj elitki kraina nie bačyła». U Minsku pabudujuć sakretnyja chmaračosy a-la Maskva-Sici
U «Hazpram centry» patłumačyli, adkul u niedabudavanym chmaračosie ŭziaŭsia hatovy ofis z vazonami
Amierykanski ekstremał zrabiŭ nievierahodnaje: biez strachoŭki padniaŭsia na chmaračos na 500 mietraŭ VIDEA
Saudaŭskaja Aravija radykalna pierahladaje płany adnosna horada budučyni koštam $500 miljardaŭ — nie chapaje hrošaj
Kamientary