Studenty pabudavali pieršuju ŭ śviecie mašynu chutkaj dapamohi na soniečnaj enierhii
Novy aŭtamabil pryznačany dla addalenych rehijonaŭ, dzie dostup da miedycynskaj dapamohi ŭskładniajuć adsutnaść elektryčnaści i paliva. Pa sutnaści, heta mini-klinika na kołach.
Jak paviedamlaje sajt Techničnaha ŭniviersiteta Ejndchoviena (Niderłandy), prajekt pad nazvaj Stella Juva raspracavała kamanda Solar Team Eindhoven. Jana abjadnoŭvaje 23 studentaŭ troch niderłandskich navučalnych ustanoŭ. Dziela pracy nad prajektam jany prypynili vučobu na hod.
U adroźnieńnie ad tradycyjnaj mašyny chutkaj dapamohi Stella Juva pryznačana nie tolki dla taho, kab dastaŭlać pacyjentaŭ u balnicu. Siarod jaje zadač — pryvieźci miedycynskuju dapamohu tudy, dzie atrymać jaje składana. Na borcie možna pravodzić analizy kryvi, abśledavańni na suchoty i malaryju, vakcynacyju, ultrahukavyja daśledavańni ciažarnych.
Ideja prajekta ŭźnikła paśla kansultacyj z arhanizacyjaj Amref Health Africa, jakaja zajmajecca raźvićciom achovy zdaroŭja ŭ krainach Afryki. Pavodle jaje pradstaŭnikoŭ, u mnohich addalenych rehijonach miedycynskim rabotnikam davodzicca pieraadolvać vialikija adlehłaści na viełasipiedach, a niestabilnaje elektrazabieśpiačeńnie nie dazvalaje zachoŭvać vakcyny pry patrebnaj tempieratury abo vykarystoŭvać častku dyjahnastyčnaha abstalavańnia. Mienavita dla takich umoŭ i raspracoŭvałasia novaja mašyna.
Enierhiju Stella Juva atrymlivaje ad soniečnych panelaŭ, ustalavanych na dachu. Jany siłkujuć jak elektraruchavik, tak i miedycynskaje abstalavańnie. Pavodle raspracoŭščykaŭ, u soniečnaje nadvorje aŭtamabil zdolny prajechać da 715 kiłamietraŭ biez padzaradki.
U žniŭni Stella Juva adpraviać u Kieniju, dzie jaje vyprabujuć u realnych umovach. Padčas pajezdki płanujecca naviedać niekalki addalenych nasielenych punktaŭ i zmadelavać roznyja scenaryi akazańnia miedycynskaj dapamohi, u tym liku pacyjentam z suchotami. Raspracoŭščyki taksama chočuć pravieryć, jak aŭtamabil paviadzie siabie padčas praciahłych pajezdak, vykarystoŭvajučy vyklučna soniečnuju enierhiju.
Pakul niezrazumieła, ci pojdzie Stella Juva ŭ masavuju vytvorčaść. Kamanda ŭ pieršuju čarhu choča prademanstravać patencyjał hetaj technałohii aŭtamabilnaj pramysłovaści i humanitarnym arhanizacyjam.
-
Navukoŭcy nazvali samyja niesumlennyja krainy śvietu. Jeŭrapiejcam i tut jość čym hanarycca
-
Jak zrabić dron amal niabačnym? Navukoŭcy prapanavali niečakana prostaje rašeńnie
-
Jon nahadvaje marskoha skata: amierykanski startap stvaryŭ samalot biez zvykłych kryłaŭ i iluminataraŭ, jaki moža stać novaj staronkaj u avijacyi
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć36
Kamientary