Top-100 kampanij Polščy ź biełaruskimi karaniami ŭznačaliŭ EPAM, u śpis uvajšła i kampanija Sachaščyka

Biełaruski pryvatny biznes u Polščy praciahvaje raści, ale značna mienšymi tempami, piša vydańnia Plan B. Pa vynikach 2023 hoda sukupnaja vyručka kampanij, jakija ŭvajšli ŭ top-100, vyrasła na 10% u paraŭnańni z 2022 hodam. U papiaredni hod naziraŭsia rost na 30% da 2021 hoda.

Na takija vyniki ŭ pieršuju čarhu paŭpłyvali pakazčyki byłoha šmathadovaha lidara top-100 — apieratara paliŭnych kart Je100 International Trade. Z-za prodažu aktyvaŭ u Biełarusi, Rasii i Kazachstanie vyručka ŭ jaho źmienšyłasia ŭ 17 razoŭ. U vyniku hrupa kampanij Je100 pieramiaściłasia ź pieršaha miesca na dziaviataje.

Druhim važnym faktaram, jaki paŭpłyvaŭ na źnižeńnie vyručki, stali sankcyi. Najbolš heta adčuli kampanii, jakija śpiecyjalizujucca na ekspartna-impartnych apieracyjach z vuhalem, lesapradukcyjaj, aŭtamabilami i abstalavańniem. U topie takich kala dziasiatka.

Padzieńnie vyručki — hałoŭnaja pryčyna taho, što top-100 pakinuli 40 kampanij, jakija ŭ jaho ŭvachodzili ŭ 2022 hodzie. Siarod inšych pryčyn — adsutnaść finansavych spravazdač šerahu kampanij i vychad biełaruskich uładalnikaŭ ź biznesaŭ u vyniku ich prodažu.

Novy drajvier rostu

Dziejańnie sankcyj pryviało da źmieny drajvieru rostu. U 2022 hodzie im byli transpartna-łahistyčnyja kampanii. Adnak za 2023 hod ich kolkaść u top-100 źmienšyłasia z 31 da 25. Z 40 da 43 vyrasła pradstaŭnictva aptavikoŭ, z 4 da 8 — kampanij, zaniatych u budaŭnictvie i deviełapmiencie.

Siarod ich — kampanija byłoha «ministra abarony» ŭ Abjadnanym pierachodnym kabiniecie Valeryja Sachaščyka Sahaty, jakaja zaniała 31-je miesca z vyručkaj u 64,2 miljona złotych (kala 17 miljonaŭ dalaraŭ), što na tracinu mienš za 2022 hod (96,6 miljona złotych).

Jak adznačaje žurnalist Vadzim Siachovič, kampanija Sahaty uznačalvała top-10 budaŭničych biznesaŭ biełarusaŭ u Polščy ŭ 2023 hodzie.

Pry hetym novym drajvieram rostu aŭtary nazyvajuć IT-halinu. Niahledziačy na toje, što kolkaść takich kampanij u top-100 vyrasła niaznačna — z 15 da 17, — heta halina dadała za 2023 hod prykładna 30% i stała hałoŭnym i pa sutnaści adzinym drajvieram ahulnaha rostu. Pieršaje miesca ŭ top-100 zaniaŭ EPAM Systems (Poland).

Maštabavańnie i aryjentacyja na stalicu

Analiz pakazaŭ, što biełaruski biznes u Polščy praciahvaŭ maštabavacca. Kali ŭ 2022 hodzie dla ŭvachodžańnia ŭ top-100 nieabchodna było zarabić 19 miljonaŭ złotych, to ŭ 2023-m — 22,7 miljona (kala 6 miljonaŭ dalaraŭ).

Kali havaryć pra hieahrafiju, to centram pryciahnieńnia zastavałasia staličnaje Mazavieckaje vajavodstva. Mienavita tut u 2023-m byli zarehistravany 52 kampanii (u 2022-m — 46). Pry hetym adbyłosia skaračeńnie biełaruskich kampanij u dvuch inšych rehijonach — Padlaskim (z 22 da 19) i Lublinskim (z 13 da 9).

Jak vyhladaje top-10

1. EPAM Systems (Poland) — najstarejšy i najbujniejšy IT-biznes ź biełaruskimi karaniami ŭ Polščy. Jaho ofisy znachodziacca ŭ piaci haradach. I da 2025 hoda taksama dziejničała daččynaja kampanija hłabalnaha EPAM — Emakina.PL.

2. Polbilding s.k.— bujny trejdar vuhalu, koksu i chimičnych praduktaŭ z rehistracyjaj u Zialonaj Hury. Štohadovy abarot hetaha biznesu, zasnavalnikam jakoha źjaŭlajecca biełarus Vital Kancevič, składaje kala miljona ton za hod. U top-100 uvachodzić i transpartna-łahistyčnaje pradpryjemstva biznesmiena — Polbilding sp.z o.o.

3. TRM Metals Polska — mietałatrejdar sa štab-kvateraj u Dubai i filijałam u Katavicach. Jaho saŭładalnik Mikałaj Parchomienka. U 1990-ja jon pracavaŭ u biełaruskaj kampanii «Jaravit».

4. E100 Power Max — adna z kampanij Hrupy E100, jakoj vałodajuć Uładzimir i Maksim Stajeckija. Jana zajmajecca aptovym i roźničnym handlem naftapraduktami na rynkach Polščy i inšych krain Centralnaj i Uschodniaj Jeŭropy.

5. TELS Global Polska — łahistyčnaje padraździaleńnie hrupy kampanij TELS Global, jakoj z Čechii kirujuć Uładzimir Tajanka i Ivan Šachovič. Źjaŭlajecca najbujniejšym transpartna-łahistyčnym biznesam biełarusaŭ u Polščy.

6. ASBIS Poland — daččynaja kampanija kiprskaha chołdynhu ASBIS'c Enterprises. Jaho zasnavalnikam i klučavym akcyjanieram źjaŭlajecca biełarus Siarhiej Kaścievič. ASBIS Poland zajmajecca dystrybucyjaj IT-pradukcyi na polskim rynku, dla čaho pabudavała składski kompleks u Rašynie.

7. DSPL — aŭtatranspartnaja kampanija, stvoranaja ŭ 2021 hodzie ŭ vyniku rearhanizacyi zamiežnaha biznesu Vasila Śmiatanina, jaki pražyvaje ŭ Maskvie. Častku jaje dolej atrymali jaho biełaruskija partniory. DSPL upieršyniu ŭvajšła ŭ top-100 i adrazu patrapiła ŭ pieršuju dziasiatku.

8. Vention Development — ​​druhi pa maštabach dziejnaści IT-biznes ź biełaruskimi ŭłaśnikami ŭ Polščy. Jaho stvaryli ŭ vyniku rełakacyi ź Biełarusi Siarhiej Kavalenka i Vasil Bajko. U kampanii — ofisy ŭ piaci polskich haradach.

9. E100 International Trade — apieratar paliŭnych kart Je100. Heta — były lidar top-100, jaki straciŭ ilvinuju dolu vyručki ŭ vyniku sychodu z rynkaŭ Biełarusi, Rasii i Kazachstana. Z 2023 hodzie hety biznes Uładzimira i Maksima Stajeckich pracavaŭ u krainach Uschodniaj i Paŭdniovaj Jeŭropy.

10. AsstrA Polska — adzin z najbujniejšych łahistyčnych biznesaŭ ź biełaruskimi karaniami. Stvaralnik AsstrA Group — biełarus Dźmitryj Łahun, a štab-kvatera mižnarodnaha chołdynha raźmieščana ŭ Šviejcaryi.

Z poŭnym śpisam top-100 možna aznajomicca tut.

• 6
• 0
• 0
• 0
• 0
• 0
• 0
• 0