Kiraŭnik ofisa prezidenta Ukrainy i były načalnik Hałoŭnaha ŭpraŭleńnia raźviedki krainy Kiryła Budanaŭ paviedamiŭ, što rehularna razmaŭlaŭ z zasnavalnikam PVK «Vahnier» Jaŭhienam Pryhožynym. Pra hetyja pieramovy jon paviedamiŭ u intervju The New York Times.
Pavodle słoŭ Budanava, jaho znosiny z Pryhožynym zaviaršylisia niezadoŭha da miaciažu PVK «Vahnier» u 2023 hodzie. Inšych padrabiaznaściaŭ hetych kantaktaŭ jon nie pryvioŭ.
Pra asabistyja pieramovy Budanava i Pryhožyna raniej viadoma nie było, raspaviadaje «Ahienctva».
U mai 2023 hoda The Washington Post sa spasyłkaj na ŭciečku amierykanskaj raźviedki pisała, što Pryhožyn kantaktavaŭ z HUR Ukrainy i prapanavaŭ raskryć pazicyi rasijskich vajskoŭcaŭ u abmien na advod ukrainskich vojskaŭ ad Bachmuta.
Z dakumientaŭ taksama vynikała, što Pryhožyn razmaŭlaŭ pa telefonie z supracoŭnikami HUR i sustrakaŭsia z aficerami ŭkrainskaj raźviedki ŭ adnoj z krain Afryki. Dva ŭkrainskija čynoŭniki tady paćvierdzili The Washington Post, što Pryhožyn niekalki razoŭ razmaŭlaŭ z pradstaŭnikami HUR. Adnak pra asabistyja razmovy Pryhožyna z Budanavym hazieta nie paviedamlała.
Sam Pryhožyn paśla ŭciečki dakumientaŭ amierykanskaj raźviedki nazvaŭ hetuju infarmacyju domysłami i iranična kazaŭ: «Viadoma, ja mahu paćvierdzić hetuju infarmacyju. Nam uvohule niama čaho chavać ad zamiežnych śpiecsłužbaŭ. My dahetul z Budanavym znachodzimsia ŭ Afrycy».
Budanaŭ užo paśla miaciažu PVK «Vahnier» admaŭlaŭsia kamientavać čutki pra jaho kantakty z Pryhožynym.
Budanaŭ uznačaliŭ ofis prezidenta Ukrainy 2 studzienia 2026 hoda. Paśla pryznačeńnia jon staŭ adnym z klučavych pieramoŭščykaŭ Kijeva pa ŭrehulavańni vajny. Da hetaha momantu Budanaŭ užo byŭ uciahnuty ŭ mirny praces: jašče ŭ listapadzie 2025 hoda Zialenski ŭklučyŭ jaho va ŭkrainskuju delehacyju dla pieramoŭ z ZŠA, inšymi partniorami i Rasijaj. Akramia taho, Budanaŭ na praciahu niekalkich hadoŭ padtrymlivaŭ kantakty z načalnikam rasijskaha HRU Iharam Kaściukovym — jany ŭpieršyniu viali pieramovy ŭ 2022 hodzie pa pytańni sudnachodstva ŭ Čornym mory, a paźniej uzajemadziejničali, u pryvatnaści, pa abmienach pałonnymi.
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary