Prezident Sierbii Alaksandr Vučyč padpisaŭ ukaz ab rospusku Narodnaj skupščyny i pryznačeńni daterminovych parłamienckich vybaraŭ. Jany pavinny prajści 25 kastryčnika. Rašeńnie było abvieščana paśla vaśmichvilinnaha zvarotu Vučyča da nacyi.
Inicyjataram daterminovych vybaraŭ staŭ urad Sierbii, jaki napiaredadni źviarnuŭsia da Vučyča z adpaviednaj prośbaj. Prezident pahadziŭsia i zajaviŭ, što vybary adbuducca 25 kastryčnika.
Vybary pryznačanyja na fonie masavych studenckich pratestaŭ, jakija praciahvajucca amal dva hady. Ich pryčynaj stała trahiedyja ŭ Novym-Sadzie ŭ listapadzie 2024 hoda, kali na čyhunačnym vakzale abrynuŭsia bietonny navies. Tady zahinuli 16 čałaviek.
Paśla trahiedyi žychary zapatrabavali apublikavać poŭnuju dakumientacyju rekanstrukcyi vakzała, jakaja była zavieršanaja niezadoŭha da abvału. Paźniej pratestoŭcy stali patrabavać rasśledavańnia nie tolki dziejańniaŭ niepasrednych vykanaŭcaŭ, ale i adkaznaści pradstaŭnikoŭ ułady. Pratesty pastupova raspaŭsiudzilisia na ŭsiu krainu.
Udzielniki akcyj abvinavačvali Vučyča, urad i kiroŭnuju Sierbskuju prahresiŭnuju partyju ŭ karupcyi. Siarod hałoŭnych patrabavańniaŭ byli adstaŭka prezidenta i ŭrada, a taksama praviadzieńnie daterminovych parłamienckich vybaraŭ.
Da leta 2026 hoda Vučyč adchilaŭ patrabavańni pratestoŭcaŭ i zajaŭlaŭ, što akcyi arhanizavanyja z-za miažy. Adnak u kancy červienia jon paviedamiŭ pra namier daterminova pakinuć pasadu prezidenta, choć i padkreśliŭ, što zastaniecca ŭ palitycy.
Paźniej Sierbskaja prahresiŭnaja partyja vyłučyła Vučyča svaim kandydatam na pasadu premjer-ministra. Kali partyja pieramoža na vybarach, Vučyč moža ŭznačalić urad i takim čynam zachavać značny palityčny ŭpłyŭ paśla zakančeńnia svajho prezidenckaha terminu ŭ 2027 hodzie.
Kamientary