Prezident Sierbii Vučyč zamiest poŭnaj adstaŭki źbirajecca pierasieści ŭ kresła premjera
Prezident Sierbii Alaksandr Vučyč uznačalić śpis kiroŭnaj Sierbskaj prahresiŭnaj partyi na budučych parłamienckich vybarach i budzie vyłučany kandydatam na pasadu premjer-ministra. Pra heta paviedamiła sama partyja.
Kiraŭnik parłamienckaj frakcyi Sierbskaj prahresiŭnaj partyi Milenka Jovanavič zajaviŭ, što Vučyč i jaho palityka źjaŭlajucca «fundamientam», na jakim siońnia trymajecca Sierbija. Pry hetym jon raskrytykavaŭ antyŭradavyja pratesty, zajaviŭšy, što ich nibyta arhanizoŭvajuć nievialikija i niestrukturavanyja palityčnyja hrupy, jakija ŭ vypadku prychodu da ŭłady mohuć pieratvaryć krainu ŭ «kancentracyjny łahier».
Sam Vučyč u lipieni ŭ intervju aŭstryjskamu vydańniu Die Presse vykazaŭ upeŭnienaść u pieramozie svajoj partyi na vybarach, jakija pavinny adbycca ŭ kastryčniku. Jon zajaviŭ, što paśla vybaraŭ Sierbija stanie ekanamična macniejšaj, a sami vybary, pavodle jaho acenki, buduć bolš demakratyčnymi, čym u mnohich inšych krainach.
U Sierbii ŭžo kala dvuch hadoŭ pieryjadyčna adbyvajucca masavyja antyŭradavyja pratesty. Asnoŭnym ruchavikom hetych akcyj stała moładź. Na fonie pratestaŭ Vučyč nieadnarazova zajaŭlaŭ, što moža daterminova pakinuć pasadu prezidenta, nie čakajučy zakančeńnia svajho ciapierašniaha terminu ŭ siaredzinie 2027 hoda.
Pavodle Kanstytucyi Sierbija źjaŭlajecca parłamienckaj respublikaj. Prezident u takoj sistemie maje pieravažna pradstaŭničyja i cyrymanijalnyja funkcyi, tady jak asnoŭnaja vykanaŭčaja ŭłada zasiarodžanaja ŭ rukach urada i premjer-ministra. Tamu pierachod Vučyča z pasady prezidenta na pasadu kiraŭnika ŭrada dazvolić jamu zachavać vyrašalny ŭpłyŭ na dziaržaŭnuju palityku.
Kamientary