Śpiecyjalny pasłańnik prezidenta ZŠA pa Biełarusi Džon Koŭł paśla viartańnia ź Minska sustreŭsia z prezidentam Litvy Hitanasam Naŭsiedam i premjer-ministram Mindaŭhasam Sinkiavičusam. Padčas pieramoŭ abmiarkoŭvali situacyju ŭ Biełarusi, vyzvaleńnie palitviaźniaŭ i pytańni rehijanalnaj biaśpieki.
Paśla sustrečy z Koŭłam, jakaja adbyłasia 16 vieraśnia, Naŭsieda zajaviŭ, što vyzvaleńnie častki palityčnych źniavolenych nie aznačaje źmieny režymu ŭ Minsku. Pavodle jaho słoŭ, dasiahnuty humanitarny prahres staŭ vynikam cisku ZŠA, adnak ahulnaja situacyja ŭ śfiery biaśpieki zastajecca praktyčna niaźmiennaj.
Litoŭski prezident adznačyŭ, što z terytoryi Biełarusi ŭ Litvu zalatajuć bieśpiłotniki, praciahvajecca prybyćcio nielehalnych mihrantaŭ, a Minsk uzmacniaje jadziernuju pahrozu kala miežaŭ NATA. U jakaści prykładu jon zhadaŭ płany pašyreńnia Biełaruskaj AES u Astraŭcy.
Razam z tym Naŭsieda pryvitaŭ damoŭlenaść ab vyzvaleńni častki palitviaźniaŭ i paabiacaŭ ZŠA ŭsiebakovuju dapamohu. Litva hatovaja padtrymlivać humanitarnuju misiju ZŠA, a taksama dapamahać vyzvalenym źniavolenym pry pierasiačeńni biełaruska-litoŭskaj miažy.
Džon Koŭł taksama pravioŭ sustreču z premjer-ministram Litvy Mindaŭhasam Sinkiavičusam. Kiraŭnik litoŭskaha ŭrada zajaviŭ, što kraina vysoka aceńvaje namahańni ZŠA pa vyzvaleńni biełaruskich palitviaźniaŭ i źnižeńni napružanaści ŭ rehijonie.
Sinkiavičus padkreśliŭ, što amierykanski dypłamatyčny ŭdzieł dapamahaje źnižać hibrydnyja pahrozy i ŭmacoŭvać biaśpieku Litvy i susiednich krain. Jon taksama paprasiŭ pieradać prezidentu ZŠA Donaldu Trampu padziaku za namahańni ŭ śfiery rehijanalnaj biaśpieki.
Sa słoŭ premjer-ministra Litvy, čym bolš uvahi Vašynhton nadaje rehijonu, tym bolšaj stanovicca jaho biaśpieka. Sinkiavičus zapeŭniŭ, što Litva i nadalej budzie nadziejnym sajuźnikam ZŠA.
Koŭł spadziajecca, što Łukašenka vyzvalić u nastupnym miesiacy jašče sotni źniavolenych
Litoŭskaja stamatałohija za hadzinu adhuknułasia dapamahčy biełarusam. Nieviadomyja historyi pieršaha dnia vyzvalenych palitviaźniaŭ
Cichanoŭskaja: Pieramovy pra vyzvaleńnie ludziej iduć ciažka
Paśla apošniaha bujnoha pamiłavańnia palitviaźniami pryznali jašče 224 čałavieki
Kamientary