Jak kłan Łukašenki atrymaŭ dolu ŭ biełaruskim Wildberries i miljonnyja dyvidendy

U Biełarusi handlovaj placoŭkaj Wildberries kiruje kampanija «IMVBRB». U 2025 hodzie ŭ jaje źjaviŭsia novy suŭładalnik — zakrytaje akcyjaniernaje tavarystva «TD Kvadrat», jakomu dastalisia 10% biznesu.

Vyśvietlić, chto staić za hetaj firmaj, žurnalistam dapamahła inšaja jaje pakupka. U tym ža hodzie «TD Kvadrat» nabyŭ amal usie akcyi Banka RRB. U aŭdytarskaj spravazdačnaści banka kančatkovym uładalnikam nazvany biznesoviec Dźmitryj Kurnosienka.

Pavialičyć

Dyrektaram «TD Kvadrat», pavodle rasśledavańnia, źjaŭlajecca Jaŭhien Vasiljeŭ. Jon ža adkazvaje ŭ biełaruskim Wildberries za pracu ź dziaržaŭnymi orhanami — pradstaŭlaje intaresy handlovaj placoŭki pierad uładami.

Mienavita praz Kurnosienku i Vasiljeva rasśledavalniki vyjšli na atačeńnie Dźmitryja i Hanny Łukašenkaŭ.

Adzin z asnoŭnych łancužkoŭ suviaziaŭ viadzie ŭ rekłamny biznes. U kancy kastryčnika 2025 hoda ŭ Biełarusi zarehistravali kampaniju «Kreatyŭny kod». Mienš čym za hod jana atrymała va ŭłasnaść amal try tysiačy rekłamnych kanstrukcyj pa krainie.

15% hetaj kampanii naležyć «Muzyčnaj miedyjakampanii», dzie hienieralnaj pradziusarkaj pracuje Hanna Łukašenka.

Jašče 10% naležyć «ANSŁ pradakšn». Asnoŭny ŭładalnik hetaj firmy, jakomu naležyć 95%, — Andrej Urubleŭski, top-mieniedžar Dźmitryja Łukašenki.

«Biuro» vykazvaje viersiju, što Urubleŭski moža być naminalnym, to-bok farmalnym, uładalnikam, za jakim chavajecca ŭdzieł Hanny Łukašenki. Žurnalisty źviartajuć uvahu i na nazvu «ANSŁ», jakaja nahadvaje spałučeńnie jaje imia i inicyjałaŭ: «ANna Siarhiejeŭna Łukašenka». 

Astatnija 75% «Kreatyŭnaha koda» naležać zakrytaj kampanii «KorusMiedyja». Jaje ŭładalniki nie raskryvajucca. Ale dyrektarkaj značycca Darja Charužka. Pavodle źviestak «Kibierpartyzan», na jakija spasyłajecca «Biuro», jana bolš za dziesiać hadoŭ pracavała ŭ «Biaśpiečnych darohach Biełarusi» — kampanii Kurnosienki.

Tak u adnym rekłamnym prajekcie syšlisia kampanija, dzie pracuje Hanna Łukašenka, firma top-mieniedžara jaje muža i struktura pad kiraŭnictvam byłoj supracoŭnicy Kurnosienki.

«Vyjaŭlenyja suviazi taksama dazvalajuć dapuścić, što Kurnosienka moža mieć dačynieńnie da rekłamnaha biznesu, źviazanaha z Hannaj Łukašenkaj», — pišuć rasśledavalniki.

Druhi łancužok viadzie praź siamju kiraŭnika «TD Kvadrat» Jaŭhiena Vasiljeva.

Jaho žonka Alena Vasiljeva raźvivaje sietku piakarniaŭ «Valenka» i z 2023 hoda źjaŭlajecca suŭładalnicaj kampanii «Siabry Ivent». Jaje partniorka ŭ hetaj kampanii — restaratarka Natalla Sadoŭskaja.

Sadoŭskaja maje dostup da kiraŭnictva krainy: u 2020 hodzie jana była hościaj na zakrytaj inaŭhuracyi Łukašenki i ŭznačaliła Asacyjacyju restarataraŭ Biełarusi. Prykładna ŭ toj ža čas Vasiljeva ŭ ŚMI pačali nazyvać staršynioj naziralnaha savieta hetaj asacyjacyi.

Ale hałoŭnaja siamiejnaja suviaź tut — praz restaran Fabriq. Sadoŭskaj i jaje bratu praz kampaniju «Staličnaja restaracyja» naležać 75% firmy, jakaja kiruje hetym restaranam. Astatnija 25% zapisanyja na Uładzimira Kułakova.

Kułakoŭ — muž rodnaj siastry Hanny Łukašenki. Takim čynam, biznes-partniorka žonki Vasiljeva viadzie ahulny restaranny biznes sa svajakom niaviestki Łukašenki.

Kułakoŭ źviazany i niepasredna ź Dźmitryjem Łukašenkam: dziesiać hadoŭ jon uznačalvaŭ «Kłub tenisa» — daččynuju strukturu Prezidenckaha spartyŭnaha kłuba. Kiraŭnik hetaha kłuba — siaredni syn Łukašenki Dźmitryj.

Asobna žurnalisty vyvučyli finansy «Siabroŭ Ivent» — sumiesnaj kampanii Aleny Vasiljevaj i Sadoŭskaj. Za 2025 hod jaje vyručka skłała 9,7 miljona rubloŭ, čysty prybytak — 1,04 miljona. Pavodle «Biuro», kampanija zajmajecca arhanizacyjaj vystupaŭ stendap-komikaŭ. Aŭtary ličać jaje abaroty niezvyčajna vialikimi dla takoj dziejnaści:

«Nie vyklučana, što mienavita ŭ «Siabrach Ivent» moža asiadać dola Vasiljeva za vyrašeńnie pytańniaŭ z Wildberries na karyść siamji Łukašenki».

Jašče adnu suviaź z atačeńniem kiraŭnika krainy žurnalisty vyjavili ŭ Kurnosienki. U jaho kampanii «Biaśpiečnyja darohi Biełarusi», jakaja ŭstaloŭvaje i absłuhoŭvaje kamiery fiksacyi parušeńniaŭ chutkaści, pracavaŭ Dźmitryj Kurakievič — były supracoŭnik Słužby biaśpieki prezidenta i asabisty kiroŭca Łukašenki. Rasśledavalniki taksama znajšli źviestki pra piać sumiesnych zamiežnych pajezdak Kurnosienki i Kurakieviča.

Pavialičyć

Hetyja kantakty «Biuro» razhladaje jak śviedčańnie taho, što dolu ŭ Wildberries atrymaŭ čałaviek, jakomu daviarajuć u atačeńni ŭłady.

«Biuro» vyvučyła finansavyja pakazčyki «TD Kvadrat» i vyjaviła, što ŭ 2025 hodzie firma atrymała krychu bolš za 70,054 miljona biełaruskich rubloŭ (20,3 miljona jeŭra) u jakaści «dachodaŭ ad udziełu va ŭstaŭnym kapitale druhich arhanizacyj». Miarkujučy pa buchhałtarskaj spravazdačnaści biełaruskaha Wildberries, amal takuju ž sumu, 70,053 miljona biełaruskich rubloŭ, kampanija vypłaciła dyvidendami akcyjanieram, a dakładniej — adnamu kankretnamu «TD Kvadrat».

Heta amal čverć čystaha prybytku biełaruskaha Wildberries za 2025 hod, jaki skłaŭ 295 miljonaŭ rubloŭ, choć dola novaha suŭładalnika — tolki 10%.

Sa svaich dachodaŭ firma vypłaciła ŭłasnamu akcyjanieru 26,7 miljona rubloŭ dyvidendaŭ.

Pavialičyć

«Jak ni kruci, ale ŭsio pakazvaje na toje, što dola biełaruskaha Wildberries znachodzicca pad kantrolem kłana Dźmitryja Łukašenki», — prychodziać da vysnovy aŭtary rasśledavańnia.

Kurnosienka admoviŭsia adkazvać na pytańni «Biuro» i nazvaŭ infarmacyju pra svajo vałodańnie «TD Kvadrat» «niepravieranaj». Vasiljeŭ nazvaŭ źviestki pra toje, što jon dyrektar hetaj kampanii, «niejkaj pamyłkaj».

• 1
• 1
• 0
• 4
• 1
• 0
• 9
• 0