Da błohiera, jaki raskazaŭ na YouTube pra pracu ŭ anłajn-kazino, prychodzili HUBAZiK z AMAPam
Błohiera Andreja Dunikoŭski miesiac tamu zatrymali pa kryminalnaj spravie za abrazu Alaksandra Łukašenki. Mužčynu pratrymali troje sutak na Akreścina, a zatym, pavodle jaho słoŭ, vypuścili pad zakład. Pra heta jon raskazaŭ na svaim YouTube-kanale, zaŭvažyła «Lusterka».
Pavodle Andreja, 14 vieraśnia da jaho dadomu pryjšli supracoŭniki HUBAZiKa i AMAPa. Mužčynu zatrymali i advieźli da śledčaj. Jana raskazała, što pa błohiera pryjšli ŭ miežach kryminalnaj spravy ab abrazie Alaksandra Łukašenki. Nahodaj dla razboru stali «niejkija śmiešnyja vidosiki z Telegram, u pryvatnaści, niejkija hifki ci niejkija prykoły».
«Nivodnaha ź ich ja nie rabiŭ sam asabista, jany prosta byli ŭziatyja ź internetu, pryčym daloka nie mnoj. Jak vy viedajecie, u mianie niekalki adminaŭ u telezie, i jany aktyŭna pościać u maju telehu ŭsiaki rozny kantent», — raskazaŭ Andrej.
Paśla hetaha mužčynu advieźli ŭ IČU na Akreścina. Tam, pavodle jaho słoŭ, było vielmi choładna, i, kab sahrecca, jon pastajanna maršyravaŭ na miescy. Na nastupny dzień Andreja advieźli ŭ RUUS, dzie jaho čakali śledčy i advakat. Tam jamu pakazali videa, da jakich uźnikli pretenzii.
«I ja pahladzieŭ hetyja vidosy, a tam absalutna niaznačnaja, nie toje kab niesurjoznaja, to-bok nijakaja nie abraźlivaja, a prosta takaja, nu, jak by viasiołaja tusovačnaja dvižucha. To-bok, naprykład, tam jość epizod, dzie prosta vielizarny nakačany Ron Kołman, kali chto nie viedaje, heta adzin z samych, jak by, krutych kulturystaŭ dzievianostych — pačatku dvuchtysiačnych, prosta z tvaram Łukašenki, nu, jak by niejrasietkaj zroblenym, prosta tam kačajecca. To-bok što tut abraźlivaha, što tut źnievažalnaha, ja nie viedaju. Heta niejkaja hifka, jakaja daŭnym-daŭno hulała pa internecie. Prosta chtości jaje reposnuŭ da mianie ŭ telehu, moža, navat ja, moža, chtości z maich adminaŭ. I ŭ vyniku jak by voś heta źjaŭlajecca typu abrazaj. I takich voś prykołaŭ tam było kala piaci», — raskazaŭ mužčyna.
Paśla dopytu ŭ RUUS mužčynu znoŭ advieźli na Akreścina, dzie jon pravioŭ jašče sutki. Paźniej Andreju paviedamili, što jon moža vyjści pad zakład.
«My stali abmiarkoŭvać prykładnyja varyjanty, jak možam ruchacca dalej. Naturalna, infarmacyja dajšła da majho pracadaŭcy. Tam chłopcy krychu prykinuli, nu i, skažam tak, prapanavali taki varyjant, jak zakład, to-bok vyjści pad zakład. <…> Chłopcy z majoj kampanii sabrali hrošy, užo paśpieli ich z ranicy ŭnieści. Ja padpisaŭ peŭnyja papiery. Dadatkova mianie jašče pryviali da načalnika, jaki skazaŭ, što, nu, jak by kiepska ja siabie pavioŭ, što nielha tak uvohule rabić, što ŭvohule ŭ hetaj krainie heta niedapuščalna — žartavać z kiraŭnika krainy i ŭsio takoje. Ja ŭ svaju čarhu skazaŭ, što ŭ heta ŭvohule nie zakładvaŭsia taki sens, što, darečy, absalutnaja praŭda. Tym nie mienš ja jak by cudoŭna razumieju, što ludziam starejšym, bolš darosłym, im, naturalna, čužyja ŭsie hetyja prykoły i ŭsio takoje», — raskazaŭ błohier.
U vyniku Andreja vypuścili ź IČU, ale kryminalnuju spravu suprać jaho pakul nie spynili.
Andrej Dunikoŭski zvolniŭsia z Betera ŭ 2024 hodzie. U 2025 hodzie jon zapisaŭ amal siamihadzinny rolik, jaki sabraŭ na YouTube sotni tysiač prahladaŭ. U videa jon raskazaŭ pra svaju pracu ŭ kampanii i śćviardžaŭ, što jaje ahresiŭnaja rekłama dobra pracuje. Paśla hetaha ŭ byłoha pracadaŭcy biełarusa ŭźnikli pretenzii da eks-supracoŭnika.
U sakaviku 2026 hoda kampanija napisała zajavu na byłoha supracoŭnika, u jakoj zapatrabavała pryciahnuć mužčynu da adkaznaści pavodle vaśmi administracyjnych artykułaŭ i adnaho kryminalnaha. Pad administracyjnymi pravaparušeńniami mielisia na ŭvazie pytańni abarony piersanalnych źviestak, a ŭ zajavie pa kryminalnym artykule zhadvaŭsia art. 369¹ («Dyskredytacyja Biełarusi»), raskazvaŭ błohier.
Kamientary