Pamiž vakzałam i praśpiektam Niezaležnaści ŭ Minsku źjavicca novy budynak
U centry Minska, pamiž čyhunačnym vakzałam i praśpiektam Niezaležnaści, płanujuć pabudavać novy šmatfunkcyjanalny budynak. Zakazčykam prajekta vystupaje Biełaruski dziaržaŭny ŭniviersitet, a architekturnuju kancepcyju raspracavaŭ instytut «Biełdziaržprajekt», piša Domovita.by.
Pad budaŭnictva vydzielili ŭčastak płoščaj 0,4054 hiektara, heta značyć krychu bolš za 4 tysiačy kvadratnych mietraŭ. Jon znachodzicca pobač z hałoŭnym korpusam BDU, chimičnym i hieahrafičnym fakultetami ŭniviersiteta. Niepadalok raźmieščanyja Pryvakzalnaja płošča i stancyja mietro «Płošča Lenina». Ciapier hetaja terytoryja adnosicca da ziemlaŭ ahulnaha karystańnia.
Pakul nieviadomyja ni dakładnaja kolkaść pavierchaŭ u budynku, ni vyhlad jaho fasadaŭ. Vizualizacyi i inšyja materyjały prajekta abiacajuć apublikavać da pačatku hramadskaha abmierkavańnia. Architektaram treba ŭpisać novuju pabudovu ŭ najaŭnuju zabudovu centra horada z ulikam vyšyni, abjomu i pryznačeńnia abjekta, a taksama hienieralnaha płana Minska.
Dla hetaha kvartała pakul nie zaćvierdžany prajekt detalovaha płanavańnia, jaki vyznačaje paramietry zabudovy terytoryi. Tamu kancepcyju vynieśli na hramadskaje abmierkavańnie jašče da pačatku prajektavańnia.
Abmierkavańnie budzie prachodzić z 26 kastryčnika da 10 listapada 2026 hoda ŭklučna. Usie schiemy i ilustracyi raźmieściać na sajcie administracyi Maskoŭskaha rajona ŭ raździele «Hramadskija abmierkavańni». Z 29 kastryčnika da 10 listapada tam taksama budzie dastupnaja anłajn-tranślacyja z prezientacyjaj prajekta.
Haradžanie zmohuć dasyłać svaje zaŭvahi i prapanovy ŭ administracyju Maskoŭskaha rajona. Heta možna budzie zrabić zvyčajnaj poštaj pa adrasie: praśpiekt Dziaržynskaha, 10, abo praz elektronnuju poštu [email protected]. U zvarocie nieabchodna paznačyć, što jon tyčycca hramadskaha abmierkavańnia.
Paśla zaviaršeńnia abmierkavańnia ŭsie atrymanyja mierkavańni razhledzić architekturna-horadabudaŭničaja rada pry hałoŭnym architektary Minska, a rajonnaja kamisija padviadzie vyniki ŭ zaklučnym pratakole.
Ciapier čytajuć
Sofja Sapieha: Pratasievič nahavaryŭ na mianie ceły tom kryminalnaj spravy2
Sofja Sapieha: Pratasievič nahavaryŭ na mianie ceły tom kryminalnaj spravy
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary