Jeŭropa nie moža zamianić ZŠA ŭ zabieśpiačeńni Ukrainy spadarožnikavymi raźvieddanymi

Ukrainskija ŭłady padazrajuć ZŠA ŭ naŭmysnym adklučeńni sistem papiaredžańnia ab rasijskich rakietnych atakach i zapavoleńni pracy Starlink paśla taho, jak Donald Tramp pajšoŭ na dyzielnuju ździełku z Uładzimiram Pucinym. U Vašynhtonie heta admaŭlajuć, piša Moscow Times.

Krainy Jeŭropy asudzili dziejańni Trampa i padtrymali Ukrainu, ale ich vajenna-kaśmičnyja mahčymaści abmiežavanyja. Jeŭropa dobra dapamahaje USU ŭ nastupalnych dziejańniach — adsočvaje z dapamohaj spadarožnikaŭ rasijskija vojski i vajennyja abjekty, kab pa ich možna było nanosić dalokija ŭdary.

Nivodnaja kraina, akramia ZŠA, nie moža zabiaśpiečyć praktyčna bieśpierapynnuju spadarožnikavuju zdymku ŭsioj terytoryi Jeŭropy.

Zdolnaść rabić heta lažyć u asnovie sistemy rańniaha papiaredžańnia ZŠA ab rakietnych pahrozach, jakija iduć ź luboha punkta Ziamli, źviartaje ŭvahu Bloomberg, i hetaja infarmacyja asabliva kaštoŭnaja dla ŭkraincaŭ.

Jeŭrapiejcy šukajuć sposaby dapamahčy Ukrainie chacia b častkova źnizić zaležnaść ad sistemy Starlink, vajennaja častka jakoj pačała davać zboi. Ale techničnyja abmiežavańni nie dazvolać hetaha zrabić jašče jak minimum niekalki hadoŭ.

Abarona ad rakiet

Amierykanskija spadarožniki Infračyrvonaj sistemy kaśmičnaha bazavańnia (SBIRS) u režymie realnaha času adsočvajuć kryłatyja rakiety i inšyja nizkalotnyja srodki paražeńnia, jakija mohuć paźbiehnuć vyjaŭleńnia naziemnymi radarami. Infarmacyja pra ich dapamahaje SPA USU, jakaja vykarystoŭvaje drony-pierachopniki, avijacyjnyja harmaty i inšyja nizkatechnałahičnyja mietady źniščeńnia rasijskich aparataŭ, jakija prymianiajucca ŭ masiravanych bambardziroŭkach ukrainskich haradoŭ.

SBIRS taksama zdolnaja vyjaŭlać vychłapnyja šlejfy balistyčnych rakiet. Hetaja infarmacyja nadzvyčaj važnaja dla Ukrainy. Kali jana pastupaje zahadzia, USU majuć bolš šancaŭ źbić rakietu na padlocie (zvyčajna dla hetaha patrabujecca dva pierachopniki). Praŭda, ciapier u SPA amal nie zastałosia amierykanskich Patriot, zdolnych spyniać balistyčnyja rakiety. Ale navat kali infarmacyja pastupić i abviestka prahučyć za 1‑2 chviliny da ŭdaru, u ludziej budzie čas schavacca ad jaho.

Ukrainskija čynoŭniki padazrajuć ZŠA ŭ pieryjadyčnym abmiežavańni pastavak raźvieddanych u apošni čas. Z-za hetaha, naprykład, u niadzielu, raskazali jany Bloomberg, rasijskija rakiety pieršaj chvali ŭdaryli biez papiaredžańnia. Pierad druhoj chvalaj, pavodle ich słoŭ, sistema rańniaha papiaredžańnia była adnoŭlena.

Ataka prachodziła ŭ niekalki chval, «i čarhovy raz ad našych partnioraŭ nie pastupiła nijakaha papiaredniaha papiaredžańnia», paviedamiŭ tady Uładzimir Zialenski. Pavodle jaho słoŭ, padčas udaru pa Kijevie i prylehłych rajonach Rasija zapuściła 16 balistyčnych rakiet.

Tramp u paniadziełak zajaviŭ, što ŭkrainski prezident «nie viedaje, pra što havoryć» i naohuł jamu ŭžo daŭno varta było b skončyć vajnu. Tramp dadaŭ:

My abmieńvajemsia raźvieddanymi, my dzielimsia mnohim. Nie raskazvajcie mnie pra Ukrainu. My šmat čaho dali Ukrainie. A jany nam ničoha nie dali.

U Jeŭropy niama płanaŭ pa stvareńni sistemy, zdolnaj paraŭnacca pa mahčymaściach z SBIRS. ZŠA majuć na arbicie amal 250 vajennych spadarožnikaŭ, Kitaj — kala 150, Rasija — kala 100; šmatlikija dadatkovyja aparaty majuć padvojnaje pryznačeńnie. U Jeŭropy ŭ cełym tolki 50 vajennych spadarožnikaŭ.

Raźviedvalnyja mahčymaści Jeŭropy

Jeŭrapiejskija spadarožniki dapamahajuć Ukrainie ŭ nastupalnych dziejańniach. Jany vyjaŭlajuć rasijskija vojski, techniku, artyleryju i inšyja vajennyja abjekty, uklučajučy składy bojeprypasaŭ, aeradromy i placoŭki dla zapusku rakiet. Finskija spadarožniki ICEYE mohuć pracavać u načny čas i pranikać skroź vobłačny pokryŭ i dym. Francuzskija datčyki rehistrujuć ciepłavoje vypramieńvańnie i fiksujuć prykmiety čałaviečaj dziejnaści, jakija zvyčajnyja kamiery mohuć lohka ŭpuścić.

Hiermanija zapłaciła kamiercyjnym kampanijam, takim jak amierykanskaja Planet Labs, za pastaŭku Ukrainie zdymkaŭ vysokaha razroźnieńnia, u tym liku z rasijskaj terytoryi. Heta dazvalaje atrymlivać danyja dla vyznačeńnia celaŭ i adsočvać pieramiaščeńni vojskaŭ, što moža dazvolić sarvać nastupleńnie.

USU taksama vykarystoŭvajuć infarmacyju pra takija celi dla ŭdaraŭ pa ich svaimi dronami.

Prablemy sa Starlink

Starlink ad kampanii Iłana Maska SpaceX vykarystoŭvajecca cyvilnymi asobami i vajskoŭcami va Ukrainie z pačatku rasijskaha ŭvarvańnia. Jana zabiaśpiečvaje suviaź u vojskach USU, taksama terminały ŭstaloŭvajucca na pavietranyja i marskija drony.

U Starlink na arbicie bolš za 10 tysiač spadarožnikaŭ. Atrymaŭšy finansavańnie ad Nacyjanalnaha ŭpraŭleńnia raźviedki ZŠA, SpaceX taksama stvaryła viersiju Starshield, jakuju nazyvaje abaronienaj sistemaj dla dziaržaŭnych zakazčykaŭ, raspracavanaj śpiecyjalna dla met nacyjanalnaj biaśpieki, tłumačyć The Wall Street Journal. U Starshield kala 200 spadarožnikaŭ, mnohija jaje mahčymaści zasakrečany.

Ukraincy ź minułaha tydnia stali paviedamlać pra stratu suviazi abo pieraboi ź joj pry pieravyšeńni dronami z ustanoŭlenymi na ich terminałami chutkaści ŭ 160 km/h, a to i ŭsiaho 60‑80 km/h. Mask paśla hetaha zajaviŭ, što Starshield naležyć i padkantrolny ŭradu ZŠA, a Starlink — kamiercyjny servis, tamu jon nie pavinien vykarystoŭvacca «dla nastupalnych vajennych dziejańniaŭ».

Tysiačy ŭkrainskich sałdat pa-raniejšamu vykarystoŭvajuć svabodna dastupnuju aparaturu Starlink, u jakoj sapraŭdy dziejničajuć abmiežavańni: naprykład, chutkasny limit nie dazvalaje stavić jaje na rakiety i chutkija drony, tłumačyć WSJ. Niekatoryja častki USU stali vykarystoŭvać sistemu Starshield, jakaja maje pašyranyja funkcyi i mienš abmiežavańniaŭ na prymianieńnie ŭ nastupalnych apieracyjach.

Mienavita ŭ Starshield i ŭźnikli prablemy z chutkaściu, z-za čaho ŭkrainskim vajennym pryjšłosia admianić niekalki apieracyj. Starshield vykarystoŭvajecca, u pryvatnaści, dla kiravańnia bieśpiłotnikami siaredniaj dalokaści i dronami-pierachopnikami, jakim treba chutka dahnać rasijskuju rakietu.

U paniadziełak viečaram Zialenski zajaviŭ, što, zhodna z dakładam hałoŭnakamandujučaha USU i niahledziačy na zajavu dziaržsakratara ZŠA Marka Rubia, abmiežavańni nie byli źniatyja całkam. «Heta tarmozić našu frantavuju łahistyku i abmiažoŭvaje vykarystańnie dronaŭ roznych typaŭ, pierš za ŭsio siaredniaj dalokaści i pierachopnikaŭ reaktyŭnych «šachiedaŭ», — napisaŭ Zialenski ŭ telehram-kanale.

Isnujučyja ci zapłanavanyja jeŭrapiejskija spadarožnikavyja sistemy nie mohuć paraŭnacca sa Starlink pa maštabach i mahčymaściach. Najbližejšy anałah, OneWeb pad kiravańniem francuzskaj Eutelsat, maje kala 600 spadarožnikaŭ. Ale ich arbita prykładna ŭdvaja vyšejšaja, čym u Starlink, što pavialičvaje čas pieradačy sihnału. U Starlink taksama vyšejšaja prapusknaja zdolnaść, lepšaje pakryćcio terytoryi i bolš kampaktnyja terminały.

ES pačaŭ farmavać hrupoŭku IRIS2 z 350 abaronienych spadarožnikaŭ, ale hety praces zavieršycca tolki ŭ 2029 hodzie. Mahčymaści Jeŭropy vyvodzić na arbitu vajennyja spadarožniki abmiežavanyja. Zapuski adzinaj jeŭrapiejskaj rakiety ciažkaha kłasa Ariane 6 ažyćciaŭlajucca prykładna 10 razoŭ na hod z kasmadroma ŭ Francuzskaj Hvijanie, kala Paŭdniovaj Amieryki.

Pakul ža jeŭrapiejcy zapłanavali ŭ pačatku 2027 hoda padklučyć Ukrainu da svajoj abaronienaj sistemy spadarožnikavaj suviazi Govsatcom, jakaja pačała pracavać sioleta. Heta pavinna dazvolić źnizić zaležnaść ad Starlink, ale nie zmoža zamianić jaje.

• 0
• 0
• 1
• 0
• 0
• 1
• 3
• 0