Čamu krakadziły pieražyli asteroid, jaki źniščyŭ dynazaŭraŭ?

Siońniašnija krakadziły źniešnie davoli padobnyja adzin da adnaho, ale ich staražytnyja svajaki byli značna bolš raznastajnymi. Siarod ich sustrakalisia pancyrnyja travajednyja žyvioły, dvuchnohija drapiežniki i hihanty pamieram z aŭtobus.

Kala 66 miljonaŭ hadoŭ tamu ŭ vyniku padzieńnia asteroida ŭ atmaśfieru trapiła vielizarnaja kolkaść pyłu i popiełu, jakaja zasłaniła soniečnaje śviatło. Płanieta pačała astyvać, parušylisia charčovyja łancužki, i mnohija vidy žyvioł źnikli nazaŭsiody. Vymierli i ŭsie dynazaŭry, akramia ptušak, jakija taksama naležać da hetaj hrupy žyvioł.

Katastrofa mocna zakranuła i krakadziłapadobnych, adnak niekatoryja ich pradstaŭniki zdoleli vyžyć.

Jak piša Scinexx.de, daśledčyki z Univiersiteckaha kaledža Łondana pad kiraŭnictvam paleantołaha Alfia Alesandra Kjarency praanalizavali bolš za siem tysiač vykapniaŭ i źviestak pra znachodki, jakija adnosiacca da bolš jak 400 sučasnych i vymierłych vidaŭ krakadziłapadobnych. Hetyja źviestki jany supastavili z rekanstrukcyjami klimatu i hieahrafii Ziamli za apošnija 245 miljonaŭ hadoŭ.

Što pakazali staražytnyja vykapni

Analiz vyjaviŭ cikavuju zakanamiernaść: niahledziačy na vialikija adroźnieńni pamiž vidami ich zaležnaść ad klimatu zastavałasia dziŭna stabilnaj. Zamiest taho kab prystasoŭvacca da ŭsio bolš chałodnych umoŭ, krakadziłapadobnyja pieravažna pieramiaščalisia ŭśled za ciopłymi klimatyčnymi zonami. Kali na płaniecie ciapleła, jany raśsialalisia dalej ad ekvatara, a pry pachaładańni viartalisia ŭ ciaplejšyja šyroty.

Naprykład, kala 50 miljonaŭ hadoŭ tamu siaredniaja tempieratura na Ziamli była prykładna na dziesiać hradusaŭ vyšejšaja za sučasnuju, a palarnyja rehijony nie byli pakrytyja lodam. Vykapni śviedčać, što svajaki krakadziłaŭ žyli navat u Antarktydzie.

Jak heta dapamahło pieražyć katastrofu

Navukoŭcy vyrašyli pravieryć, što adbyvałasia z prydatnymi dla krakadziłapadobnych terytoryjami paśla padzieńnia asteroida. Dla hetaha jany vykarystali klimatyčnyja madeli, jakija ŭličvali źmianšeńnie soniečnaha vypramieńvańnia praz pył i popieł u atmaśfiery.

Vyśvietliłasia, što pry skaračeńni kolkaści soniečnaha śviatła na 5-10% rajony pablizu ekvatara i ŭ subtropikach zastavalisia dastatkova ciopłymi. Tolki pry źnižeńni soniečnaha vypramieńvańnia na 15% hetyja prydatnyja dla žyćcia terytoryi źnikali ŭ kampjutarnych madelach. Adnak taki ekstremalny scenar u realnaści daśledčyki ličać małavierahodnym.

Navukoŭcy miarkujuć, što prychilnaść da ciopłaha klimatu mahła zahadzia pryvieści niekatoryja hrupy krakadziłapadobnych u rehijony, dzie nastupstvy katastrofy byli mienš surovymi. Častka papulacyj mahła zachavacca tam, a paśla pastupova adnavić kolkaść.

Adnak heta nie adzinaje mahčymaje tłumačeńnie. Na vyžyvańnie mahli paŭpłyvać i inšyja asablivaści hetych žyvioł: zdolnaść žyć jak u vadzie, tak i na sušy, raznastajny racyjon, davoli nievialikija pamiery niekatorych vidaŭ i nizkaja patreba ŭ enierhii.

Da taho ž vysnovy pra terytoryi, jakija mahli stać prytułkam, zasnavanyja na kampjutarnym madelavańni, a nie na niepasrednych źviestkach pra ŭmovy ŭ hetych rehijonach paśla katastrofy.

Adnak, jak zaŭvažajuć aŭtary daśledavańnia, siońnia krakadziłam budzie ciažej karystacca stratehijaj, jakaja dapamahała im vyžyvać na praciahu miljonaŭ hadoŭ. Raniej jany mahli ratavacca ad klimatyčnych źmien, pieramiaščajučysia ŭ bolš spryjalnyja rehijony. Ciapier ža harady, darohi i sielskahaspadarčyja ziemli ŭsio bolš abmiažoŭvajuć takuju mahčymaść. Va ŭmovach hłabalnaha paciapleńnia heta moža stać surjoznaj prablemaj dla sučasnych vidaŭ.

• 5
• 1
• 0
• 1
• 1
• 1
• 0
• 0