«На Данбас усім пофіг». Колькі галасоў збіраюцца намаляваць на «рэферэндумах»
Мяркуецца, што за «далучэнне» прагаласуе прыкладна 90 працэнтаў.
23 верасня ў самаабвешчаных ДНР і ЛНР, а таксама на захопленых расійскім войскам тэрыторыях Херсонскай і Запарожскай абласцей Украіны пачаліся «рэферэндумы аб далучэнні да РФ». Прадоўжацца яны да 27 верасня. Агучаныя прыкладныя вынікі «галасавання».
Як паведамляе «Медуза», «галасаванне» на акупаваных тэрыторыях будзе падобнае на сітуацыю з «рэферэндумам» перад анексіяй Крыма ў 2014 годзе. А менавіта: у першы дзень адкрыецца невялікая колькасць участкаў, на якія «мабілізуюць» прарасійскіх жыхароў. У выніку, падкрэслілі крыніцы, гэта дазволіць расійскай прапагандзе «паказаць карцінку» з чэргамі перад участкамі і нібыта высокай яўкай на месцах. Такія сюжэты ўжо з'явіліся ў расійскіх дзяржаўных СМІ.
Паводле звестак дзвюх крыніц «Медузы», блізкіх да Крамля, расійскія ўлады маюць намер «забяспечыць» наступныя вынікі «рэферэндумаў»:
у ДНР і ЛНР — прыкладна 90% за «далучэнне да РФ» пры яўцы каля 90%;
на акупаваных тэрыторыях Херсонскай і Запарожскай абласцей — прыкладна 90% за «далучэнне» пры яўцы каля 80%.
Расійскі ВЦІОМ 23 верасня ўжо апублікаваў вынікі апытанняў, згодна з якімі ў самаабвешчаных ДНР і ЛНР у «рэферэндуме» збіраюцца ўзяць удзел 87% рэспандэнтаў, а «прагаласаваць» за «далучэнне да РФ» маюць намер 97% з іх. У Херсонскай вобласці, паводле звестак ВЦІОМ, «галасаваць» збіраюцца 69%, а падтрымаць «далучэнне да Расіі» — 89% з іх. У Запарожскай вобласці прыйсці на «рэферэндум» нібыта збіраецца 80%, а падтрымаць пастанову Крамля — 87%.
Крыніца «Медузы», блізкая да АП, назвала вынікі гэтага апытання «фармуючымі» — каб падрыхтаваць расійскае грамадства да афіцыйна абвешчаных вынікаў «галасавання».
Самі «плебісцыты» два суразмоўцы «Медузы», блізкія да Крамля, назвалі «рытуалам з вядомым вынікам» — і адзначылі, што ў АП ужо плануюць правесці на акупаваных тэрыторыях выбары ў мясцовыя органы ўлады. Суразмоўцы падкрэслілі, што пратэстаў ад жыхароў акупаваных тэрыторый падчас «рэферэндумаў» не чакаюць, але не выключаюць, што ўкраінскія сілы могуць працягнуць контрнаступленне.
Пры гэтым адна з крыніц дадала: у Крамлі ўжо не спадзяваюцца, што далучэнне новых тэрыторый выкліча ў Расіі рост падтрымкі ўлады: «На Данбас большасці ***** [усё роўна]. Цяпер народ заклапочаны мабілізацыяй».
Цяпер чытаюць
«Я зарабляла на OnlyFans $2000‑3000 на месяц». Беларуска расказала, як стала здымаць кантэнт для дарослых і чаму па-ранейшаму жыве без сэксу15
«Я зарабляла на OnlyFans $2000‑3000 на месяц». Беларуска расказала, як стала здымаць кантэнт для дарослых і чаму па-ранейшаму жыве без сэксу
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку5454
Каментары