Еўрасаюз думае ўвесці лічбавыя шэнгенскія візы з магчымасцю атрымання іх анлайн
Еўрапарламент і Рада ЕС дамовіліся зрабіць працэдуру падачы заяў на атрыманне шэнгенскіх віз цалкам анлайн, пра гэта піша SchengenVisaInfo.com. Новае палажэнне аб лічбавізацыі працэдуры атрымання шэнгенскай візы прадугледжвае сістэму анлайн-заявак і замену традыцыйнай візавай налепкі лічбавым двухмерным штрыхкодам.
На думку Рады ЕС, асноўная мэта — спрасціць працэс падачы заявы на атрыманне візы і павысіць эфектыўнасць. Акрамя таго, улады Еўрасаюза спадзяюцца, што новыя правілы ўмацуюць бяспеку ўнутры Шэнгенскай зоны.
Праўда, пра дакладныя тэрміны, калі гэтая навінка можа ўвайсці ў жыццё, пакуль не паведамляецца. Спачатку пагадненне мусяць ухваліць краіны — сяброўкі ЕС, каб пасля таго можна было пачаць працэдуру прыняцця.
Далей будзе створаная новая платформа для падачы заявак на атрыманне шэнгенскай візы, якая дазволіць усім заяўнікам уводзіць адпаведныя звесткі, загружаць электронныя копіі праязных дакументаў і дакументаў, што пацвярджаюць асобу, а таксама аплачваць візавы збор. Праз гэты ж вэб-сайт заяўнікі, як плануецца, будуць атрымліваць апавяшчэнні аб рашэннях па выдачы візы.
Пасля таго асабістыя візіты ў консульстве спатрэбяцца толькі асобам, якія падаюць дакументы ўпершыню, асобам з новымі праязнымі дакументамі і асобам з пратэрмінаванымі біяметрычнымі звесткамі.
Плануецца, што шэнгенскія візы будуць выдавацца ў лічбавым фармаце ў выглядзе двухмернага штрыхкода з крыптаграфічным подпісам. Гэтая новая форма нацэленая на змяншэнне рызык, звязаных з падробленымі і выкрадзенымі візавымі налепкамі, што ўмацуе цэласнасць візавай сістэмы.
Цяпер чытаюць
Касмічная турыстка Марына Васілеўская выйшла замуж за касманаўта Навіцкага? Яны носяць пярсцёнкі16
Каментары