Спецыяліст па іміджы тлумачыць, што не так са шкарпэткамі Аляксандра Азарава і як не памыліцца, выбіраючы гэты прадмет гардэробу.
На канферэнцыі «Новая Беларусь», якая нядаўна прайшла ў Варшаве, Аляксандра Азарава вызвалілі ад пасады прадстаўніка Аб'яднанага пераходнага кабінета па аднаўленні правапарадку і законнасці. Гучная адстаўка абмяркоўвалася ў сацыяльных сетках, але неўзабаве грамадскасць пераключылася на іншую цікавую дэталь — жоўтыя шкарпэткі палітыка, які трапіў у няміласць. Піша Кацярына Гардзеева.
Яркія шкарпэткі — своеасаблівы трэнд у свеце афіцыйнай моды. Палітыкі і бізнэсмены, якія згодна з абавязкам службы вымушаныя прытрымлівацца кансерватыўнага стылю, знаходзяць прастору для творчасці ў дэталях — гальштуках, нагрудных насоўках і, вядома, шкарпэтках.
Самы вядомы аматар спалучэння яркіх вырабаў са строгімі касцюмамі — прэм'ер-міністр Канады Джасцін Трудо. Пры выбары шкарпэтак канадскі дзеяч кіруецца ідэяй «чым ярчэй, тым лепш» і смела дапаўняе імі афіцыйныя лукі.
Такое свавольства іграе на руку Трудо: крэатыўны падыход да стылю дапамагае палітыку стварыць лёгкі і вельмі чалавечны вобраз, а таксама трансляваць схаваныя мэсэджы.
Так, 25 чэрвеня 2017 года прэм'ер-міністр наведаў гей-парад, які праходзіў у Таронта. У той дзень гарнітур палітыка дапаўнялі шкарпэткі ў вясёлкавых колерах ЛГБТ-сцяга, упрыгожаныя адной цікавай дэталлю. Калі прыгледзецца да іх, можна было заўважыць арабскі надпіс «Ід мубарак». Гэтая фраза нясе важны сэнс для мусульман — звычайна яе гавораць у свята завяршэння святога месяца Рамадан. Па збегу акалічнасцяў менавіта яно выпала на дзень правядзення прайду.
Такім лукам Джасцін Трудо хацеў прадэманстраваць лаяльнасць да дзвюх важных груп, якія ёсць у канадскім грамадстве, а таксама падтрымаць мясцовага вытворцу шкарпэтак — кампанію Halal Socks.
Што не так са шкарпэткамі Азарава?
Беларускі дзеяч Аляксандр Азараў вырашыў працягнуць запамінальны трэнд і прыйшоў на афіцыйную канферэнцыю ў ярка-жоўтых шкарпэтках. Але калі да абранага адцення ніякіх заўваг быць не можа — гэты колер цалкам дарэчны для мерапрыемстваў з такім узроўнем кансерватыўнасці, — то даўжыня выклікае пэўныя пытанні.
Рэч у тым, што афіцыйны дрэс-код патрабуе няўхільна прытрымлівацца некаторых правілаў.
Адно з іх — шкарпэткі павінны быць такой даўжыні, каб цалкам закрываць нагу. Кароткія лічацца спартовымі і падыходзяць выключна для вобразаў у стылі кэжуал, спорт ці спорт-шык і ніколі не надзяваюцца ў спалучэнні са строгімі гарнітурамі і класічнымі туфлямі.
Смела насіце каляровыя шкарпэткі, але памятайце пра гэтае правіла.
«Наша Нiва» — бастыён беларушчыны
ПАДТРЫМАЦЬЦяпер чытаюць
Былога беларускага палітвязня судзяць у Літве за падрыхтоўку да забойству расійскага апазіцыянера. Пагражае аж да пажыццёвага7
Каментары