Ілан Маск заявіў аб планах вытворчасці на заводзе «Тэсла» пад Берлінам аўтамабіля коштам 25 тысяч еўра.
Як паведамляе Reuters, на мінулым тыдні Ілан Маск наведаў завод у Грунхайдзе (Gruenheide) пад Берлінам, дзе паведаміў аб планах вытворчасці электрамабіля коштам 25 тысяч еўра. Такі кошт стане канкурэнтаздольным у параўнанні з коштам кітайскіх электракараў у 31 тысячу еўра. Цяпер электрамабілі ў Еўропе каштуюць у сярэднім больш за 65 тысяч еўра.
Выданне піша, што планы вытворчасці больш даступнага для масавага спажыўца аўтамабіля Ілан Маск агучваў даўно, але летась яны былі адкладзены з прычыны неасвоенасці тэхналогій.
Але ў верасні гэтага года стала вядома, што вытворца наблізіўся да тэхналагічнага прарыву, які дазволіць адліць амаль усё днішча адным элементам, што значна паскорыць вытворчасць і зменшыць выдаткі.
Як паведамляецца, Tesla імкнецца стаць лідарам у сферы электрамабіляў і паставіла амбіцыйную мэту вытворчасці да 20 мільёнаў аўтамабіляў да 2030 года. Для гэтага неабходна заваяваць масавы рынак. Такія планы вылучаюць Tesla сярод канкурэнтаў, такіх, як Volkswagen, якія не ставяць канкрэтных мэтаў па вытворчасці і сканцэнтравалі свае стратэгіі на захаванні рэнтабельнасці пры пераходзе на вытворчасць электракараў.
У планах Tesla павялічыць магутнасць завода ў Германіі да 1 мільёна аўтамабіляў у год. Цяпер, па ацэнках спецыялістаў, яна складае каля 250 тысяч.
На сустрэчы з калектывам завода Маск таксама заявіў аб планаваным павышэнні заробку, якое ў гадавым вымярэнні павінна скласці 18%. Як сцвярджаецца, гэта дазволіць толькі дагнаць іншых аўтавытворцаў Германіі. Па інфармацыі нямецкага прафсаюза IG Metall, у 2022 годзе заработная плата на заводзе Tesla была прыкладна на 20% ніжэйшая за прадугледжаную калектыўнымі пагадненнямі ў іншых аўтавытворцаў.
Выданне звяртае ўвагу, што амбіцыйным планам Tesla могуць перашкодзіць мясцовыя ўлады, якія ў кастрычніку накіравалі запыт аўтавытворцу аб наданні дадатковай інфармацыі пра тое, як ягоныя планы пашырэння будуць адпавядаць прыродаахоўным законам. Толькі пасля гэтага яны прымуць рашэнне, ці можна іх зацвердзіць.
Чытайце яшчэ:
«Таёта» зрабіла стаўку на перадавыя тэхналогіі. Але на справе не так усё проста
Беларусы цяпер змогуць купіць для асабістага карыстання «Танк»
Каментары