80-гадовая жанчына ледзь не прадала кватэру для месенджарных аферыстаў. Але рыэлтары своечасова адумаліся
Гісторыя цынічнага падману пачалася з традыцыйнага званка ў месенджары ад невядомага абанента. 80-гадовай жыхарцы Светлагорска патэлефанаваў нібыта палкоўнік з Мінска і ашаламіў непрыемнай навіной: вядомая махлярка выставіла на аўкцыён яе кватэру.
Суразмоўца прадставіўся Віктарам Мікалаевічам і папрасіў дапамогі ў затрыманні злачынцы. Пасля пераканаўчага спічу законапаслухмяная пенсіянерка пагадзілася паспрыяць, паведамляе СК.
Згодна з планам спецаперацыі, бабулі належыла ўпотай ад усіх звязацца з рыэлтарам, прадаць кватэру і атрымаць далейшыя інструкцыі. «Палкоўнік» усведамляў складанасць задання для старэнькага чалавека і аказваў шчыльнае «суправаджэнне»: часта тэлефанаваў, пакрокава тлумачыў усе дзеянні, патрабаваў дэталёвых справаздач.
Махляр скінуў пенсіянерцы кантакты рыэлтараў. Патрэбныя спецыялісты знайшліся ў суседнім горадзе. Да пацярпелай прыехалі дзве супрацоўніцы агенцтва нерухомасці і распавялі пра нюансы ўгоды. Бабуля сабрала неабходныя дакументы і падпісала з імі дамову.
Пакупнік знайшоўся з другой спробы. Пацярпелая атрымала перадаплату і паведаміла аб поспеху куратару. Той загадаў пасля продажу кватэры часова прапісацца ў Мінскім раёне і прывезці ў сталіцу атрыманыя грошы.
Бабуля зазбіралася ў дарогу. Аднак нечакана яе наведалі рыэлтары і сталі ўгаворваць … скасаваць дамову куплі-продажу.
Агенты западозрылі падвох з боку тэлефонных махляроў і паспрабавалі прадухіліць бяду: пераконвалі, прыводзілі прыклады махлярства з тэматычнага артыкула ў інтэрнэце.
Калі рыэлтары нарэшце сышлі, разгубленая пенсіянерка патэлефанавала «Віктару Мікалаевічу». Ветлівы дагэтуль куратар сеў, як кажуць, на каня.
Ён выкрываў рыэлтараў у падмане, настойваў на завяршэнні спецаперацыі, пагражаў стратай грошай і кватэры. Ашаломленая бабуля кінула слухаўку і патэлефанавала сваякам. Яны адвезлі яе для разбору ў міліцыю.
Пакупніку той кватэры вярнулі задатак, а Светлагорскі раённы аддзел Следчага камітэта распачаў крымінальную справу паводле ч. 1 арт.14 ч. 1 арт. 209 (замах на махлярства).
«Спачатку вельмі цяжка нешта западозрыць». Дзяўчына падманула хлопца на 700 рублёў, прапанаваўшы сустрэцца на бутафорскім стэндапе
Добрая зніжка ці махляры? Як не даць сябе падмануць пры набыцці тавараў у Instagram
Махляры прыдумалі яшчэ адзін спосаб інтэрнэт-падману, на які можа трапіцца кожная сям'я
Цяпер чытаюць
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары