Лукашэнка загадаў усім фірмам таксі перайсці ў беларускую юрысдыкцыю. А таксама зліваць інфармацыю пра паездкі
Сёння ў Аляксандра Лукашэнкі прайшла нарада, на якой абмеркавалі працу транспарту. Закранулі працу таксі — праект указа Лукашэнкі на гэты конт ужо гатовы. Чакаецца шмат зменаў на рынку.
Віцэ-прэмʼер Анатоль Сівак, які ва ўрадзе адказвае за транспартную сферу, расказаў, што ў большасці выпадкаў нерэгулярныя пасажырскія перавозкі (у асноўным, работа таксі) арганізуюць замежныя фірмы, так званыя дыспетчары.
Іх інфармацыйныя сістэмы і рэсурсы часта знаходзяцца за межамі Беларусі. Абмежаванняў для дзейнасці нерэзідэнтаў у якасці арганізатараў перавозак (дыспетчараў) у цяперашні час не ўстаноўлена, таксама не патрабуецца атрыманне якіх-небудзь дазволаў.
У выніку гэтыя замежныя субʼекты зацікаўлены толькі ў атрыманні даходаў, нягледзячы на законнасць выканання такіх перавозак, паскардзіўся Сівак. Таксама беларускія ўлады не маюць доступу да інфармацыі пра паездкі беларусаў.
«Інфармацыя аб выкананых заказах і звесткі аб заказчыках перавозак захоўваюцца на серверах, якія знаходзяцца за межамі Беларусі, што непасрэдна ўплывае на забеспячэнне нацыянальнай бяспекі», — сказаў віцэ-прэмʼер.
«Гэта значыць, ты заказваеш таксі, у маршрутцы дзесьці едзеш, гэтая ўся інфармацыя збіраецца на замежных серверах, і там гэта ўсё захоўваецца?» — удакладніў Лукашэнка.
Анатоль Сівак пацвердзіў, што гэта сапраўды так: «Грошы чалавека і інфармацыя аб гэтай перавозцы сыходзіла за мяжу. У дадзеным выпадку, ў Галандыю. Калі пачаліся санкцыі, гэтая карціна змянілася — грошы пачалі сыходзіць у Расію. Акрамя таго, вам за перавозку неабходна заплаціць, напрыклад, 10 рублёў. Гэтая кампанія сабе пакідала 20-30%, умоўна тры рублі, а сем вяртала перавозчыку. Вось такая была схема разлікаў. Па такой схеме працуюць і іншыя сэрвісы».
Віцэ-прэмʼер таксама паскардзіўся на пагаршэнне сітуацыі з бяспекай пасажырскіх перавозак, аб чым, паводле яго, сведчыць статыстыка ДТЗ. Паводле яго, нібыта расце колькасць скаргаў з боку насельніцтва і адносна даступнасці паслуг, раскладу перавозак.
«Існуючыя памеры штрафаў і меры адказнасці не дазваляюць належным чынам спыніць парушэнні заканадаўства», — сказаў Анатоль Сівак.
Як высветлілася, ужо гатовы праект Указа, ён «быў падрыхтаваны з мэтай навядзення парадку ў сферы аўтамабільных перавозак пасажыраў».
«Прадугледжана стварэнне дзяржаўнага рэестра перавозак пасажыраў, у які будуць уключацца звесткі аб перавозчыках, транспартных сродках (аўтобусах, легкавых аўтамабілях і аўтамабілях таксі), вадзіцелях і дыспетчарах. Гэта завершаны пералік», — далажыў віцэ-прэмʼер.
Там прадугледжаны абавязак для субʼектаў даваць дзяржаўным органам доступ да інфармацыі аб выкананых заказах.
А самі заказы на перавозкі можна будзе перадаваць толькі тым перавозчыкам, звесткі пра якіх будуць унесены ў рэестр.
Для змяншэння імпарту паслуг, зніжэння рызыкі ўцечкі персанальных даных грамадзян праектам указа ўстаноўлена права замежных кампаній аказваць паслугі дыспетчара нерэгулярных перавозак пасажыраў (дыспетчара таксі) толькі ў выпадку стварэння імі на тэрыторыі Беларусі юрыдычнай асобы. Яны таксама будуць абавязаны выкарыстоўваць у сваёй дзейнасці інфармацыйныя сістэмы і рэсурсы, размешчаныя на тэрыторыі Беларусі.
Плануецца ўстанавіць абавязак відэафіксацыі выканання перавозак пасажыраў, як сцвярджаецца, у мэтах «павышэння ўзроўню бяспекі для перавозчыкаў».
Цяпер чытаюць
А што будзе, калі вярнуцца ў Беларусь? Кажуць жа, што рэпрэсіі заканчваюцца5
А што будзе, калі вярнуцца ў Беларусь? Кажуць жа, што рэпрэсіі заканчваюцца
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра1919
Каментары