«Расія — чалавекацэнтрычнае грамадства». Старэйшая дачка Пуціна дала вялікае інтэрвʼю
Марыя Варанцова, старэйшая дачка прэзідэнта Расіі, дала рэдкае інтэрвʼю. Для гэтага яна выбрала незвычайную пляцоўку — праект маскоўскіх уладаў Medtech.moscow. На ютубе і ў тэлеграме інтэрвʼю і пасты аб ім набралі ад некалькіх дзясяткаў да некалькіх сотняў праглядаў. Толькі ва «УКантакце» ў відэа — сотні тысяч праглядаў і пры гэтым ніводнага каментара. Паразмаўляў з дачкой прэзідэнта былы сталічны чыноўнік, піша «Агентство».
У інтэрвʼю, якое незаўважна для чытачоў было апублікавана 16 снежня, Варанцову прадстаўляюць як намесніцу дэкана па навуцы факультэта фундаментальнай медыцыны МДУ ім. М. В. Ламаносава, сяброўку прэзідыума Расійскай асацыяцыі садзейнічання навукі РФ, вядучую навуковую супрацоўніцу НМДЦ Эндакрыналогіі Міністэрства аховы здароўя Расіі. Аб роднаснай сувязі з прэзідэнтам не паведамляецца.
Падчас інтэрвʼю Варанцовай задаюць пытанні аб найноўшых тэхналогіях у медыцыне. Яна разважае аб CRISPR, штучным інтэлекце (у тым ліку ChatGPT), генератыўнай медыцыне, лячэнні на аснове ствалавых клетках.
Некаторыя тэхналогіі, на думку Варанцовай, неабходна выкарыстоўваць, нягледзячы на вялікія выдаткі, паколькі «Расея — чалавекацэнтрычнае грамадства».
«Для нас найвышэйшай каштоўнасцю зʼяўляецца каштоўнасць чалавечага жыцця», — сцвярджае дачка кіраўніка дзяржавы, які пачаў самую кровапралітную вайну ў Еўропе з часоў Другой Сусветнай вайны.
Варанцова таксама адказвае на некаторыя асабістыя пытанні. З літаратуры ёй «вельмі падабаецца» Пушкін. Паводле яе слоў, яна можа шмат разоў перачытваць «Яўгена Анегіна», казкі (у іх «мараль праўды ёсць»).
Сярод іншых любімых кніг Варанцова назвала «Ідыёта» Дастаеўскага, «Дзівосны новы свет» Олдаса Хакслі, «Пыха і перадузятасць» Джэйн Осцін.
Па словах Варанцовай, яна прачытала 12 тамоў «Дзюны» Фрэнка Герберта («і прыквел, і сіквел, і асноўныя кнігі»). «Там шмат цікавых ідэй, у тым ліку светапоглядных», — патлумачыла Варанцова (насамрэч Фрэнк Герберт напісаў 6 тамоў «Дзюны». Тут Варанцова відавочна мае на ўвазе раманы ягонага сына Браяна, напісаныя ім пасля смерці бацькі ў суаўтарстве з Кевінам Андэрсанам. — Заўв. НН).
Сваім хобі дачка прэзідэнта назвала сваю прафесію: «Я нават у вольны час чытаю навуковую ці медычную літаратуру». Акрамя таго, яе «натхняе ўсё, што прыгожае, любыя карціны, музеі, тэатры, музыка (і класічная і джазавая)».
«Ну і куды без спорту: рух — жыццё», — кажа Варанцова. Паводле яе слоў, яна прысвячае «хаця б некалькі гадзін у тыдзень здароваму ладу жыцця, спорту», захапляецца серфінгам і лыжамі.
Самая вялікая мара як лекара — дзіцячага эндакрынолага — убачыць дзень, калі хаця б частку захворванняў стала магчымым вылечыць, як навукоўцы — даведацца, адкуль на планеце зямля зʼявілася жыццё або зразумець, як зʼяўляецца думка.
Як чалавек Варанцова «марыць аб тым, каб людзі мелі магчымасць і прытрымліваліся гэтай магчымасці спазнаваць сябе і спазнаваць сябе як цэласнай асобы», «каб мы ўсё лепш разумелі адзін аднаго, лепш камунікавалі».
У апошнія гады дочкі Пуціна пачалі зʼяўляцца на публіцы.
Мерапрыемствы з Варанцовай час ад часу асвятляюць дзяржаўныя тэлеканалы. Кацярына Ціханава ў 2021 годзе выступала на Пецярбургскім эканамічным форуме.
Дочкі Пуціна і беларус, які вучыўся на нелегала ў Акадэміі СВР. У Расіі апублікаванае расследаванне пра канспіратыўныя кватэры
ЗША ўвялі санкцыі супраць Мішусціна, Мядзведзева, дачок Пуціна, жонкі і дачкі Лаўрова. Але гэта не ўсё
Пуціна падчас прэс-канферэнцыі спыталі пра яго дачок. Ён так нічога і не адказаў
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку31
Каментары