Хутка праграмісты стануць непатрэбныя, іх заменіць штучны інтэлект — кіраўнік NVIDIA
На думку Джэнсена Хуанга, улічваючы тэмпы развіцця нейрасетак, усю працу за праграмістаў у будучыні будзе выконваць штучны інтэлект. Мовай праграмавання стане звычайная людская, мяркуе ён.
У час свайго выступлення на канферэнцыі World Government Summit у Дубаі кіраўнік кампаніі NVIDIA Джэнсен Хуанг (Jensen Huang) расказаў пра сваё бачанне будучыні адукацыі ў сферы інфармацыйных тэхналогій.
«Апошнія 10—15 гадоў амаль кожны, хто сядзеў на такой сцэне, казаў, што вашым дзецям жыццёва неабходна вывучаць інфарматыку. Кожны павінен навучыцца праграмаванню. Насамрэч сітуацыя — з дакладнасцю да наадварот.
Наша задача — ствараць такую камп'ютарную тэхналогію, каб нікому не даводзілася праграмаваць, каб мовай праграмавання была звычайная людская. Зараз усе на свеце будуць праграмістамі. У гэтым і заключаецца цуд штучнага інтэлекту. Упершыню за ўвесь час мы пераадолелі тэхналагічны разрыў. І менавіта з гэтай прычыны так шмат людзей могуць выкарыстоўваць штучны інтэлект», — заявіў Хуанг.
На думку кіраўніка NVIDIA, сёння трэба інвеставаць у набыццё вопыту ў такіх галінах, як сельская гаспадарка, біялогія, вытворчасць і адукацыя. Цяпер важна добра разбірацца ў канкрэтнай галіне, дзе чалавек можа выкарыстоўваць дапамогу тэхналогій штучнага інтэлекту для пераадолення праблем і пошуку інавацыйных рашэнняў, якія раней запатрабавалі б шмат часу і працоўнай сілы.
«Тыя людзі, якія разбіраюцца ў сваёй сферы, зараз змогуць выкарыстоўваць лёгка даступныя тэхналогіі. Цяпер у цябе ёсць кампʼютар, які будзе рабіць тое, што ты яму скажаш, каб дапамагчы аўтаматызаваць тваю працу і павысіць тваю прадукцыйнасць», — адзначыў Хуанг.
Кіраўнік NVIDIA звярнуў увагу на тое, што цяпер неабходна павышаць кваліфікацыю кожнага ў выкарыстанні штучнага інтэлекту:
«Вельмі важна павысіць кваліфікацыю кожнага. І я ўпэўнены, што працэс павышэння кваліфікацыі будзе цудоўным. Дзіўна ўсведамляць, што кампʼютар можа выконваць усе тыя дзеянні, якія вы яму даручаеце».
На пытанне, якой спецыяльнасці ён бы параіў зараз навучыцца, Хуанг адказаў, што калі б ён пачынаў усё спачатку, то прысвяціў бы сябе вывучэнню біялогіі чалавека.
Аднак некаторыя аналітыкі адзначаюць, што ў Хуанга значна больш прычын для таго, каб расхвальваць перавагі штучнага інтэлекту, чым у якой іншай кампаніі.
Схаваным матывам можа быць жаданне дагадзіць інвестарам і акцыянерам NVIDIA, якая дзякуючы свайму абсталяванню, прызначанаму для іншых буйных тэхналагічных кампаній, што займаюцца стварэннем і даследаваннем штучнага інтэлекту, у сярэдзіне лютага гэтага года стала чацвёртай па капіталізацыі ў свеце, абагнаўшы такіх гігантаў, як Alphabet (Google) і Amazon.
Чытайце яшчэ:
ЗША забаранілі пастаўкі чыпаў у Беларусь і не толькі
-
«Наступныя год-два вырашаць лёс чалавецтва». Інжынер, які звольніўся з Anthropic, расказаў, што думаюць унутры кампаніі
-
Штучны інтэлект рашыў задачу Наўе—Стокса, якую людзі не маглі разгадаць 90 гадоў. Гісторыя, аднак, абярнулася скандалам
-
Інжынер з Anthropic звольніўся, каб папярэдзіць, што ШІ вось-вось можа выйсці з-пад кантролю
Каментары
а такі любімы Дизайнером мой муж яшчэ гадоў 8-10 таму казаў, што праграмісты ў будучыні будуць непатрэбны. ён казаў - "будуць інжынеры-праграмісты. бо мне прасцей самому б было зрабіць, чым растлумачыць нашым праграмістам, што мне трэба. але мне трохі не хапае ведаў у праграмаванні"