Яны абвінавачваюцца ў перапраўцы цыгарэт з Беларусі. Акруговая пракуратура Замосці накіравала ў раённы суд Любліна абвінаваўчае заключэнне, піша Reform.news.
38 чалавек, паводле версіі абвінавачвання, з'яўляюцца ўдзельнікамі чатырох асобных арганізаваных груп. Для перапраўкі цыгарэт праз мяжу яны выкарыстоўвалі грузавыя цягнікі, якія ідуць праз пераход у Тарэспалі. Схему кантрабанды раскрылі супрацоўнікі Надбужанскага аддзялення пагранічнай аховы. Яно ж і вяло следства.
Як паведамілі ў памежнай ахове Польшчы, абвінавачаныя працавалі з грамадзянамі Беларусі, якія грузілі цыгарэты ў цягнікі ў нашай краіне. Звычайна іх хавалі ў кантэйнерах, а таксама ў вагонах з вуглём, драўнінай або дранкай.
Схаваўшы цыгарэты, беларускія партнёры кантрабандыстаў інфармавалі іх аб нумарах вагонаў з нелегальным грузам.
У далейшым члены АЗГ арганізоўвалі праз супрацоўнікаў польскіх тэрміналаў дастаўку вагонаў у месцы, зручныя для выгрузкі кантрабанды. Цыгарэты вывозіліся на легкавых аўтамабілях і фургонах.
Тытунёвыя вырабы далей перапрадаваліся пакупнікам ва ўнутраных раёнах Польшчы. Беларускія партнёры кантрабандыстаў атрымлівалі сваё ўзнагароджанне праз кіроўцаў-дальнабойшчыкаў і машыністаў цягнікоў, з якімі перадаваліся грошы.
Групы дзейнічалі з ліпеня 2019 года па кастрычнік 2021 года. За гэты час, паводле звестак памежнай аховы, яны змаглі пераправіць больш за 1,67 млн пачкаў цыгарэт на суму 11,72 млн злотых. Шкода для польскай казны ацэньваецца ў 39,24 млн злотых (каля 10 млн даляраў).
Падчас ператрусаў былі канфіскаваныя 154 літры алкагольных напояў без польскіх акцызных марак, газавыя пісталеты, больш за 7 кг наркатычных рэчываў, а таксама два аўтамабілі з перабітымі vin-нумарамі.
Даходы ад кантрабанды ўдзельнікі злачынных груп укладвалі ў нерухомасць і дарагія аўтамабілі.
Большасць падазраваных прызналі сваю віну і супрацоўнічалі са следствам. 24 фігуранты падалі заявы аб гатоўнасці добраахвотна панесці пакаранне, узгодненае з пракурорам. Пад вартай утрымліваюцца 10 абвінавачаных.
Цяпер чытаюць
Трамп падзякаваў «магутнаму лідару Беларусі»: Спадзяюся, 1300 чалавек хутка будуць вызвалены!41
Каментары