Суд закрыў справу акцёра Алека Болдуіна, якога абвінавачвалі ў ненаўмысным забойстве аператаркі-ўкраінкі на здымках
42-гадовая Галіна Хатчынс была забітая ў кастрычніку 2021 года падчас рэпетыцыі адной са сцэн стрэлам з рэвальвера, якім па сюжэце фільма карыстаўся Болдуін — ён быў зараджаны баявымі патронамі замест халастых.
Суд штата Нью-Мексіка ў пятніцу зняў з Алека Болдуіна абвінавачванні ў ненаўмысным забойстве кінааператара Галіны Хатчынс на здымачнай пляцоўцы фільма Rust восенню 2021 года, пасля таго як адвакаты кінаакцёра заявілі, што бок абвінавачвання схаваў важныя доказы па справе, піша Бі-бі-сі.
42-гадовая ўраджэнка Украіны Галіна Хатчынс была забітая падчас рэпетыцыі адной са сцэн стрэлам з рэвальвера, якім па сюжэце фільма карыстаўся Болдуін — ён быў зараджаны баявымі патронамі замест халастых.
Раней было ўстаноўлена, што піратэхнік фільма Ханна Гут'ерэс-Рыд выпадкова пераблытала рэквізітныя кулі з баявымі патронамі, якія яна прынесла з дому. У пачатку гэтага года яна была прызнаная вінаватай у ненаўмысным забойстве і прысуджаная да 18 месяцаў турмы.
Бок абвінавачвання сцвярджаў, што Болдуін груба грэбаваў тэхнікай бяспекі на здымачнай пляцоўцы. Яму таксама пагражала да 18 месяцаў турэмнага зняволення. Ён адмаўляў віну.
Працэс над Болдуінам з удзелам Калегіі прысяжных пачаўся ў Санта-Фе, сталіцы амерыканскага штата Нью-Мексіка, 10 ліпеня, і доўжыўся ўсяго тры дні.
Адвакаты падалі хадайніцтва аб спыненні справы ў пятніцу раніцай, сцвярджаючы, што пракуроры не перадалі камандзе абароны ключавы доказ — партыю патронаў, якія фігуравалі ў справе. Тым самым яны паставілі пад сумнеў ход расследавання і паказалі на памылкі, дапушчаныя следчымі, якія працавалі на месцы здарэння.
Напярэдадні падчас судовага разбору крыміналіст заявіў у судзе, што чалавек па імені Трой Тэскэ, былы афіцэр паліцыі, перадаў следству баявыя патроны, якія маглі мець дачыненне да гэтай справы.
Тэске сябруе з айчымам асуджанай па справе Ханны Гут'ерэс-Рыд. Ён таксама працаваў з памочнікам па рэквізіце здымачнай групы.
Па словах адваката Болдуіна, гэтыя патроны маглі быць звязаныя са смерцю Хатчынс, але былі зарэгістраваныя ў іншай справе пад іншым нумарам.
Пракуроры сцвярджалі, што боепрыпасы не мелі дачынення да справы і не адпавядалі кулям, знойдзеным на здымачнай пляцоўцы.
Аднак суддзя Мэры Марлоу Сомер пастанавіла, што іх трэба было перадаць камандзе абароны Болдуіна.
«Утойванне гэтай інфармацыі ўладамі было свядомым і наўмысным, — заявіла яна. — У суда няма магчымасці выправіць гэтую памылку».
У выніку адзін са спецпракурораў падаў у адстаўку, а суддзя распусціла калегію прысяжных і пастанавіла закрыць справу.
Пры абвяшчэнні судовага рашэння Алек Болдуін расплакаўся. Потым яны абняліся з адвакатам і жонкай.
Пракуроры не змогуць зноў выставіць абвінавачванне супраць Болдуіна, паколькі суд цалкам закрыў справу без права аднаўлення.
«Суд пайшоў на крайнюю меру. Справа закрытая», — заявіў Бі-бі-сі адвакат па крымінальных справах з Лос-Анджэлеса Джошуа Рытэр.
Піратэхнік фільма «Іржа» атрымала рэальны тэрмін за ненаўмыснае забойства аператаркі на здымачнай пляцоўцы
Алеку Болдуіну выставілі абвінавачванні ў ненаўмысным забойстве аператара Галіны Хатчынс. Яго могуць пасадзіць на пяць гадоў
На здымках фільма акцёр Алек Болдуін выпадкова застрэліў аператара і параніў рэжысёра
Каментары