Мастацтвазнаўца Мікіта Моніч працягвае знаёміць з сучасным мастацтвам Беларусі.
З 6 верасня па 13 кастрычніка ў Палацы мастацтваў праходзіць чарговы «Восеньскі салон» — адна з самых маштабных выставаў-продажаў сучаснага мастацтва ў Беларусі. На ім выстаўленыя больш за 400 твораў 200 аўтараў.
Шматлікія творцы страцілі магчымасць выстаўляцца па палітычных прычынах. Вось на каго раіць звярнуць увагу Моніч у новым выпуску свайго ютуб-канала «Каля культуры» з тых, каму выстаўляцца дазволена.
Лізавета Пастушэнка
Лізавета Пастушэнка — гэта спрактыкаваная мастачка, якая працуе выкладчыцай малюнка, ілюстратарам, мастаком-пастаноўшчыкам.
Па словах Моніча. яе працы часта вылучаюцца сімвалічнасцю і элементамі сюррэалізму: «Лізавета ўражвае маштабам сваіх прац, не цураецца пэўнага сюррэалізму. Некаторыя яе творы нагадваюць майго ўлюбёнага Паўла Татарнікава».
Настасся Шведава
Па словах Моніча, Настасся Шведава знаходзіцца ў пошуку сваёй мастацкай мовы, ствараючы творы, напоўненыя міфалагічнымі і фэнтэзійнымі элементамі. Вядучы захапляецца яе падыходам: «Калі гляджу на розныя штукі, што яна робіць, то нібыта бачу адну і тую ж інтанацыю».
Асабліва моцна яго ўразіў калаж «Эксперыментальны рыбтылоід», які ён апісвае як працу, што мяшае фантазійныя вобразы з рэальным светам.
Аляксей Жукаў
Аляксей Жукаў — архітэктар па прафесіі, але любіць маляваць, у асноўным рэалістычныя архітэктурныя кампазіцыі. Яго працы вылучаюцца дэталізацыяй і падрабязным адлюстраваннем класічных архітэктурных элементаў.
Моніч звяртае ўвагу на карціну «Мінулае ў сучасным», на якой прыгожыя пілястры класічнай архітэктуры кантрастуюць са спарахнелым станам будынка.
Марыя Кручкова
Марыя Кручкова — рознабаковая мастачка, вядомая сваёй майстэрскай працай з колерам і мазаікай. Яе творы ўражваюць сваёй насычанасцю і гармоніяй колераў. Моніч адзначае: «Гэтыя колеры нават праз экран майго камп'ютара выглядаюць вельмі пераканаўча і прыгожа».
Асабліва яго ўразіў яе твор «Пад покрывам», які ён апісвае як «вялікі і дэталізаваны».
Ілля Гічан
Моніч заўважае, што Ілля Гічан вядомы сваёй працай у галіне жывапісу і скульптуры, яго творы вылучаюцца глыбокай псіхалагічнай асновай і тонкай працай з вобразамі.
Моніч асабліва вылучае працу «Crow» (Крумкач) 2023 года, падкрэсліваючы яе псіхалагічную глыбіню: «Па сваёй псіхалагічнай грунтоўнасці не саступае героям кніг Свена Нурквіста».
Пейзажы Гічана таксама ўразілі Мікіту Моніча: «У ягоных творах я бачу тое, што люблю ў працах Курбэ, Дабіньі і Левітана».
Гэтыя мастакі, кожны са сваім унікальным падыходам, адлюстроўваюць разнастайнасць і багатую спадчыну сучаснага беларускага мастацтва. Кожны з іх уносіць нешта новае і самабытнае, і іх творы заслугоўваюць увагі.
Цяпер чытаюць
Ці закрыюць Еўропу для беларусаў? Дарадца Ціханоўскай распавёў, пра што дамовіўся ў Берліне11
Каментары