Загінуў аўтаслесар-лудаман з Віцебшчыны. Грошы прайграваў у казіно, а зарабляць пайшоў на вайну
У 39‑гадовага Дзяніса Луцава ў Расіі застаўся дзевяцігадовы сын, у выхаванні якога ён не ўдзельнічаў. Мужчына знік без вестак 7 кастрычніка 2026 года на Запарожскім кірунку, а роўна праз месяц яго цела апазналі ў моргу Растова-на-Доне.
Дзяніс Луцаў нарадзіўся ў 1987 годзе ў вёсцы Валькі Віцебскага раёна, а пасля перабраўся ў Ціхінічы Рагачоўскага раёна Гомельскай вобласці.
Доўгі час мужчына жыў у Маскве і Падмаскоўі, дзе працаваў аўтаслесарам і слесарам-матарыстам. Ён рамантаваў машыны ў гаражным аўтасэрвісе і захапляўся ўседарожнікамі.
У Маскве беларус жыў у грамадзянскім шлюбе з расіянкай Яўгеніяй Лондаравай, у 2017 годзе ў пары нарадзіўся сын Дзмітрый. Аднак пазней сям'я распалася.
У тэлеграм-чатах былая сужыцельніца скардзілася, што Луцаў цалкам знік з жыцця дзіцяці і ніяк не дапамагаў яму фінансава, праз што яна нават шкадавала, што запісала сына на прозвішча бацькі.
Між тым, сама жанчына пасля пачатку поўнамаштабнага ўварвання выйшла замуж за расійскага мабілізаванага і стала заўзятай актывісткай Z-суполак — рэгулярна збірала гуманітарную дапамогу для расійскіх вайскоўцаў і абуралася тымі, хто жыве звычайным жыццём па-за вайной.
У самога Дзяніса Луцава ў апошнія гады былі сур'ёзныя праблемы з фінансамі і гульнявой залежнасцю. Ужо ў 2023 годзе ён цікавіўся працэдурай банкруцтва фізічных асоб. Цягам першай паловы 2026 года мужчына амаль штодня сядзеў у тэлеграм-чатах нелегальных анлайн-казіно і крыптагульняў («Фортуна Мать», Selector, Brillx, Duck × My × Duck), дзе лавіў капеечныя бонусы, выпрошваў у іншых карыстальнікаў па некалькі даляраў у крыптавалюце і скардзіўся на буйныя прайграныя сумы.
Як менавіта беларус трапіў у расійскае войска (вайсковая часць 25573), дакладна невядома, але 26 сакавіка 2026 года ён пісаў у чатах, што знаходзіцца ў Петрапаўлаўску-Камчацкім і тэрмінова распрадае свае гульнявыя актывы.
Апошнія паведамленні ў яго акаўнце датуюцца 4 чэрвеня 2026 года — пасля гэтага ён, імаверна, адправіўся на фронт. Паводле слоў яго былой грамадзянскай жонкі, Луцаў ваяваў на перадавой на Запарожскім кірунку і перастаў выходзіць на сувязь 7 кастрычніка 2026 года падчас выканання баявога задання.
У ноч на 7 лістапада з часці паведамілі, што ён загінуў: цела ўжо даставілі ў Растоў-на-Доне і апазналі без дадатковай экспертызы ДНК сваякоў. Найбліжэйшым часам труну з целам Дзяніса Луцава плануюць адправіць праз Маскву да родных у Беларусь.
«Наша Нiва» — бастыён беларушчыны
ПАДТРЫМАЦЬ49‑гадовага лесніка з радзімы Лукашэнкі з двума дзясяткамі судзімасцяў узялі ў палон ва Украіне
«Беларус» са Жлобіншчыны са шматлікімі судзімасцямі і даўгамі па аліментах застаўся ў палях пад Купянскам
Прарасійскага актывіста з Латвіі, які ваяваў з бел-чырвона-белым сцягам, у Расіі прымусілі падпісаць вайсковы кантракт і адправілі на вайну
Каментары
[Зрэдагавана]
Ня можа быць! Ізноў вясковыя са сьвятога простага народу, а не міфічныя панаехаўшыя расейцы