Тур патлумачыў, што Лукашэнка меў на ўвазе, кажучы пра прызначэнне дырэктараў у прыватныя кампаніі
Нядаўняя прапанова Лукашэнкі, каб кіраўнікі райвыканкамаў прызначалі кіраўнікоў прыватных структур, выклікала шырокі рэзананс і, як выглядае, уладам ён не спадабаўся. Дзеля таго растлумачыць, што ж такое Лукашэнка насамрэч нібыта меў на ўвазе, даручылі вядомаму прапагандысту Ігару Туру.
Ігар Тур крытыкуе апанентаў улады, якія, паводле яго слоў, прама сцвярджаюць, што старшыні райвыканкамаў будуць прызначаць кіраўнікоў у прыватным бізнэсе, а каб давесці, што насамрэч гэта не так, цытуе Лукашэнку:
«Нічога страшнага, калі ён [старшыня райвыканкама] у нейкім сэнсе будзе прызначаць, зацвярджаць, узгадняць кіраўнікоў прыватных структур. Тады і ўплыў будзе ў іх на гэта».
Тур сцвярджае, што гэтыя словы, маўляў — не прамая пастаноўка задачы, а «разважанні на нарадзе». Таксама яму падаюцца важнымі агаворкі «ў нейкім сэнсе» і варыянтнасць дзеянняў, якія могуць рабіць кіраўнікі раённай вертыкалі з кіраўнікамі прыватных структур.
Прапагандыст лічыць, што гаворка ў гэтай цытаце ідзе перадусім толькі пра ўзгадненне, і прапанова, маўляў, «звядзецца да права вета ад улады на прызначэнне кіраўніком прыватнага бізнэсу нейкага суб'екта».
Бо, маўляў, калі прыватная структура банкрутуе, а дырэктар яе бясследна знікае, то ўсе ідуць да дзяржавы з просьбай аб рознага кшталту ўмяшальніцтве і дапамозе. А дзяржава ў Беларусі такая добрая, што не можа пакінуць людзей сам на сам са сваімі праблемамі і заўсёды ратуе ахвяр прыватнага бізнэсу, «таму што свае ж людзі».
«І калі дзяржава ў асобе мясцовай улады бачыць, што ў прыватны бізнэс прызначыць спрабуюць сумнеўнага кіраўніка — лепш адразу гэта заблакаваць, каб папярэдзіць праблемы людзей, якія потым старшыні выканкама давядзецца вырашаць».
Прытым Тур сцвярджае, што нефармальна, як гэта вядзецца ў Беларусі, падобная практыка і так ужо дзесяцігоддзямі існуе, хоць законамі аформленая не была:
«Ёсць падставы меркаваць, што ў дзяржавы і мясцовай улады і раней было і ёсць «права вета» на прызначэнне кіраўніка прыватнага бізнэсу».
Гэты непублічны механізм заснаваны
«на паважлівай, але настойлівай просьбе да ўладальніка бізнэсу прыняць іншае рашэнне. Дзесяцігоддзямі працуе так, і ніякага крыку ад бізнэсу, калі гэта бізнэс, а не палітычны каля-бізнэс».
Больш таго, сам бізнэс, маўляў, «з задавальненнем ідзе насустрач», бо ён «заўсёды хоча дружбы ці хаця б канструктыўных адносін з уладай, а не гордай і тупаватай «незалежнасці». Для яго нібыта галоўнае ў жыцці — кампраміс з дзяржаўным бізнэсам, які ў рэгіёне прадстаўляе старшыня райвыканкама.
Таму, падсумоўвае прапагандыст, «прапанова Аляксандра Лукашэнкі — катэгарычна правільная», а таксама «крутая ды своечасовая».
Лукашэнка хоча, каб кіраўнікі райвыканкамаў прызначалі і дырэктараў прыватных структур
Беларускія бізнэсмены прадстаўлялі на міжнароднай канферэнцыі Зімбабвэ
Былы міністр унутраных спраў Беларусі мае бізнэс у акупаваным Марыупалі
«Недалёкі чалавек, які займаецца паклёпам». Беларуска расказала, як мусіла ліквідаваць бізнэс і з'ехаць пасля нападак Бондаравай
Як «кашалёк» Лукашэнкі Зайцаў зарабляе на продажы люксавага адзення
Каментары
Насамрэч: не. Нахабныя тлумачэнні для бедных пад дурня.
Адразу было зразумела, што ўзгадненне кіраўнікоў з правам вета гэта кантроль над прыватным бізнесам. Калі не выконваеш каманд па вертыкалі, ўзгадненне прыпыняецца, а бізнес гэты час стаіць.
Пры ўзгадненні будуць праверкі кіраўніка у КДБ і МУС, пасля ўзгадняць і ўвесь штат з ідэолагамі (каб не ўзялі на працу былых палітвязняў), пасля прыняць на працу свайго ідэолага і г.д.
Каманды па вертыкалі гэта чарговы ўзлом прававой сістэмы, калі сістэма працуе не па правілах і дамоўленасцях, а па хацелках зверху.
Пакуль гэтыя малпы з гранатамі зусім не даломяць цывілізацыю ў дзяржаве, нічога не зразумеюць. Хаця і тады не зразумеюць, спішуць на "ворагаў".