Польшча дала грамадзянства беларусу, які 12 гадоў даказваў, што не ўяўляе сабой пагрозы
Ваявода Куяўска-Паморскага ваяводства даў грамадзянства Польшчы беларусу польскага паходжання Паўлу Юшкевічу.
Ваявода Куяўска-Паморскага ваяводства Міхал Штыбля надаў грамадзянства Польшчы Паўлу Юшкевічу, ураджэнцу Беларусі польскага паходжання. Цягам 12 гадоў мужчына спрабаваў даказаць, што не з’яўляецца пагрозай бяспецы Польшчы. У нейкі момант над ім навісла пагроза дэпартацыі, піша Most.
Павел прыехаў у Польшчу ў 2003 годзе пасля заканчэння школы. Ён скончыў педагагічны факультэт і факультэт міжнародных адносін ва Універсітэце Мікалая Каперніка. На падставе польскіх каранёў атрымаў пастаянны дазвол на жыхарства і ў 2012 годзе ўпершыню падаў заяву на польскае грамадзянства. Аднак яму адмовілі, спаслаўшыся на сакрэтнае заключэнне спецслужбаў, якія палічылі, што Павел можа ўяўляць пагрозу бяспецы і грамадскаму парадку.
З таго часу ён абскарджваў гэтае рашэнне, але ў лістападзе 2023 года яго пазбавілі пастаяннага ДНЖ і прадпісалі пакінуць Польшчу. Павел доўга змагаўся за тое, каб яго не дэпартавалі ў Беларусь, і нават падаў заяву аб міжнароднай абароне. У ліпені 2024 года суд адмяніў рашэнне аб ануляванні ДНЖ, і Павел зноў падаў дакументы на польскі пашпарт. У студзені 2025 года ён нарэшце атрымаў грамадзянства.
— Я адчуў вялікую радасць, палёгку і разуменне, што ўсе мае праблемы нарэшце скончыліся. Пасля года, а калі дакладней, пасля 12 гадоў. Гэтая гісторыя цягнулася вельмі доўга, — сказаў Павел у інтэрв’ю тэлеканалу TVP3.
У абарону Паўла выступалі акадэмічныя колы, беларуская эміграцыя, а таксама Святлана Ціханоўская, ваявода Куяўска-Паморскага ваяводства і старшыня Торуньскага гарадскога савета.
— Змагаўся я, змагаліся мае знаёмыя і неабыякавыя людзі, якія не прымалі такое становішча. Гэта каштавала мне вельмі дорага. Думаю, наступствы для здароўя я буду адчуваць яшчэ доўга, але галоўнае — шчаслівы канец, — падсумаваў Павел.
Каментары