У 2022 годзе Залужны прапаноўваў наступаць на Белгарад, каб абараніць Харкаў
Дарадца і кансультант былога галоўнакамандуючага УСУ Валерыя Залужнага генерал-маёр Віктар Назараў распавёў ВВС, што ў 2022 годзе Залужны прапаноўваў правесці аперацыю на тэрыторыі РФ. Тады, паводле яго слоў, гаворка ішла аб Белгародскай вобласці, каб пазбавіць суперніка магчымасці біць па Харкаве.
«Дарэчы, гэтая [Курская] аперацыя не ўнікальная… Як паўстала ідэя гэтага наступу? Яшчэ калі быў Залужны, у снежні 2022 года, на адной з нарад, дзе прысутнічаў я, у апараце СНБА, мы такія рыхтавалі прапановы, і я ў іх асабіста ўдзельнічаў… Я ведаю дакладна, што Валерый Фёдаравіч на адным з пасяджэнняў у СНБА, ён агучыў гэтыя аперацыі, якія фактычна зараз мы назіраем. Паколькі гэта ўжо адбываецца, я думаю, што гэта не таямніца, мы можам пра гэта сказаць…
Тады ў тым варыянце, які мы агучвалі, там ішла размова аб Белгародскай вобласці. Менавіта прапаноўваліся такія кірункі дзеянняў для таго, каб стварыць вельмі сур'ёзную пагрозу саперніку», — распавёў генерал.
Па словах Назарава, гаворка ішла пра акружэнне ці блакаванне Белгарада, каб пазбавіць саперніка магчымасці наносіць удары па Харкаве і стварыць пагрозу паўночна-ўсходняму флангу пастаўкі матэрыяльных рэсурсаў для той групоўкі, якая дзейнічае на Данбасе.
Назараў дадаў, што тады гэтыя планы не былі рэалізаваны, а Залужнага пасля гэтага знялі з пасады: «У мяне склалася ўражанне, што яны не зацікавілі нікога. А потым пачалося тое, што пачалося і вось тое, што мы бачылі на працягу 2024 года».
На думку генерала, украінская аперацыя на Куршчыне была праведзена паспяхова: «Калі параўноўваць з контрнаступленнем 2023 года — яна была праведзена амаль па ўсіх канонах ваеннага мастацтва. Быў дасягнуты фактар раптоўнасці. Гэта трымалася ў максімальнай таямніцы да апошняга дня. Было нечакана для саперніка не толькі з пункта гледжання тактычных наступстваў, але і аператыўных», — сказаў ён.
На яго думку, Курская аперацыя прыцягнула за сабой іміджавыя бонусы для УСУ.
Каментары