«Трамп і Вэнс хацелі прынізіць Зяленскага. Вось чаму яны зладзілі прамую трансляцыю гэтага відовішча»
Трамп і Вэнс «завабілі Зяленскага ў пастку». Эксперты па-ранейшаму шукаюць адказы, што ж адбылося ў Белым доме паміж лідарамі ЗША і Украіны.
Сустрэча прэзідэнта ЗША Дональда Трампа з Уладзімірам Зяленскім у Авальным кабінеце стала гучным скандалам. Многія аналітыкі ў заходніх краінах упэўненыя, што гэта была загадзя спланаваная акцыя, мэта якой была ў публічным прыніжэнні ўкраінскага лідара, піша Bild.
У прыватнасці, прафесар міжнароднай палітыкі Томас Егер мяркуе, што «скандал быў інсцэніраваны», а Вашынгтон з самага пачатку рыхтаваў Зяленскаму пастку.
Адным з галоўных дзейных асоб стаў Джэй Дзі Вэнс — віцэ-прэзідэнт і найбліжэйшы паплечнік Трампа. Яго жорсткія выказванні на Мюнхенскай канферэнцыі па бяспецы раней ужо выклікалі абурэнне ў Еўропе.
«Трамп і Вэнс хацелі прынізіць Зяленскага. Вось чаму яны зладзілі прамую трансляцыю гэтага відовішча. Спачатку яны яго дражнілі, а потым укусілі», — адзначыў Егер у размове з BILD.
У якасці прынады, паводле яго слоў, выкарыстоўвалася магчымае пагадненне з Украінай па пастаўках рэдказямельных металаў, але, па словах эксперта, сапраўднай мэтай было павышэнне ўзроўню падтрымкі прарасійскага курсу Трампа ў ЗША.
Трамп, мяркуе Егер, спрабуе пераканаць амерыканцаў, што Украіна «нявартая» далейшай дапамогі, бо нібыта паводзіць сябе няўдзячна. Пакуль гэтая ідэя сустракае супраціў у ЗША, але сярод прыхільнікаў Трампа ўжо выклікае захапленне.
«Трамп у цяперашні час падрывае дамінуючае становішча ЗША ў міжнароднай палітыцы. Але ён адштурхнуў ад сябе ўсіх хаўруснікаў, якіх Злучаныя Штаты набылі за апошнія 80 гадоў», — дадаў Егер.
Пакуль што Трамп упэўнена ідзе па шляху збліжэння з Уладзімірам Пуціным, але Егер скептычна ацэньвае яго перспектывы.
«Трамп мяркуе, што знайшоў у Пуціне сябра, але той яго проста выкарыстоўвае», — падкрэсліў экспэрт.
Цяпер чытаюць
33-гадовы беларускі кікбаксёр-чэмпіён памёр ад рэдкай анкалогіі3
Каментары