Міністр абароны ЗША Піт Хегсет загадаў прыпыніць кібератакі супраць Расіі, паведамляюць адразу некалькі амерыканскіх СМІ са спасылкай на крыніцы. Дэталі загаду невядомыя, але журналісты звязваюць яго з цяперашнімі перамовамі паміж Расіяй і ЗША і імкненнем Дональда Трампа дабіцца перамір’я ў расійска-ўкраінскай вайне, піша Бі-бі-сі.
Пра тое, што Хегсет загадаў прыпыніць кібератакі супраць Расіі, напісала газета New York Times, якая спаслалася на тры неназваныя крыніцы, знаёмыя з сітуацыяй.
Паводле выдання, новыя інструкцыі былі выдадзеныя Кіберкамандаванню ЗША яшчэ да таго, як прэзідэнт краіны Дональд Трамп на вачах у журналістаў пасварыўся з украінскім лідарам Уладзімірам Зяленскім.
Упершыню пра загад распавяло выданне The Record. У яго публікацыі было сказана, што кіраўнік Пентагона выдаў адпаведныя інструкцыі начальніку Кіберкамандавання ЗША генералу Ціматы Хо. Той, у сваю чаргу, перадаў іх аперацыйнаму дырэктару арганізацыі, генерал-маёру корпуса марской пяхоты Раяну Хэрытэджу, які пакідае пасаду.
Дэталі загаду Хегсета невядомыя.
Але Washington Post са спасылкай на аднаго дзеючага і аднаго былога чыноўніка піша, што кібератакі прыпыненыя на час перамоў паміж ЗША і Расіяй. Камандаванню сказалі, што новыя інструкцыі будуць дзейнічаць «у найбліжэйшай будучыні», заяўляюць крыніцы The Record.
Крыніцы The Record таксама распавялі, што Кіберкамандаванне пачало складаць «ацэнку рызыкаў» для Хегсета. Такога роду справаздача пацвярджае атрыманне загаду, пералічвае бягучыя місіі, прыпыненыя ў выніку рашэння, і падрабязна апісвае патэнцыйныя пагрозы, якія ўсё яшчэ сыходзяць ад Расіі.
Пентагон адмовіўся ад каментарыяў. «Для міністра абароны Хегсета няма нічога больш важнага, чым бяспека байцоў ва ўсіх аперацыях, у тым ліку ў аперацыях у кіберпрасторы», — сказалі ў ведамстве.
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй43
Каментары
по понятиям гопников, дальше будет акт публичного унижения.