12 украінскіх ваеннапалонных з «Азова» асудзілі на тэрміны ад 13 да 23 гадоў. Яшчэ 11 — завочна
Паўднёвы акруговы ваенны суд у Растове-на-Доне прызначыў рэальныя тэрміны зняволення ў калоніі строгага рэжыму для ўкраінскіх палонных, якія ў розныя гады служылі ў палку «Азоў», паведамляе «Медыязона».
Судовая калегія пад старшынствам суддзі Вячаслава Корсакава вынесла наступныя прысуды: Яраслаў Ждамараў, Аляксандр Мерачэнец, Мікіта Цімонін, Аляксандр Мухін, Алег Тышкула і Артур Грэцкі — па 22 гады калоніі строгага рэжыму; Аляксандр Ірха і Арцём Грабяшкоў — па 20 гадоў; Алег Міжгарадскі — 17 гадоў; Алег Жаркоў — 13 гадоў; Анатоль Грыцык — 19 гадоў; Аляксей Смыкаў — 23 гады.
Усе яны плануюць абскардзіць прысуд. У суд іх прывялі ў кайданках. Перад абвяшчэннем рашэння Алегу Жаркову стала блага — забалеў жывот, яму выклікалі хуткую дапамогу.
Яшчэ адзінаццаць фігурантаў справы атрымалі завочныя прысуды, бо былі раней вернутыя ва Украіну ў рамках абмену палоннымі. Так, Давіда Касаткіна і Дзмітрыя Лабінскага завочна асудзілі на 23 гады калоніі строгага рэжыму.
Дзевяці жанчынам, якія ў розныя гады працавалі ў палку «Азоў» армейскімі паварыхамі, таксама вынесены завочныя прысуды — рэальныя тэрміны ў калоніі агульнага рэжыму, бо жаночых калоній строгага рэжыму ў Расіі няма:
Алена Абрамава, Алена Бандарчук, Лілія Паўрыянідыс, Ніна Бандарэнка, Ірына Магіціч, Уладзіслава Майбарода, Марына Тэкін — па 13 гадоў калоніі; Лілія Рудэнка і Наталля Гальфінер — па 14 гадоў.
Абвінавачванне супраць палонных украінцаў будавалася на тым, што ўсе яны ў розны час праходзілі службу ў атрадзе асаблівага прызначэння «Азоў» і выказвалі «негатыўнае стаўленне да рускамоўнага насельніцтва», а таксама прытрымліваліся «праўкраінскіх радыкальных поглядаў».
Каментары