Калегі Анжалікі Мельнікавай расказалі пра апошнія размовы з ёй

«Радыё Свабода» пагаварыла з калегамі Анжалікі Мельнікавай, якія размаўлялі з ёй незадоўга да афіцыйнай заявы пра яе знікненне.

Паводле крыніц «Свабоды», Анжаліка збірала даныя для складання кантрактаў па супрацоўніцтве з Каардынацыйнай радай — гэта пашпартныя звесткі, адрас, нумар банкаўскага рахунку. Размовы адбываліся тады, калі, паводле інфармацыі Паўла Латушкі, тэлефон Анжалікі нібыта ўжо фіксавалі ў Беларусі.

Народнае антыкрызіснае ўпраўленне Паўла Латушкі самастойна вызначыла, што мабільная прылада Мельнікавай была лакалізаваная на тэрыторыі Беларусі 19 і 25 сакавіка. Пры гэтым адзін з яе гаджэтаў яшчэ 18 сакавіка знаходзіўся ў Варшаве.

«Мы размаўлялі па працы. Размова была самая звычайная, яна была спакойная, жартавала. Абсалютна нічога не паказвала, што нешта здарылася», — расказаў «Свабодзе» адзін з сяброў Каардынацыйнай рады.

Паводле слоў выканаўцы абавязкаў спікеркі Каардынацыйнай рады Станіславы Гліннік, сябры арганізацыі звярнуліся ў польскае МУС з прапановай дапамогі ў расследаванні, калі паліцыі будзе патрэбна ад іх інфармацыя:

«На сённяшні дзень мы сабралі досыць поўную карціну, хто і калі кантактаваў з Анжалікай унутры Каардынацыйнай рады, але гэта не дапамагае зразумець, што адбылося».

Павел Латушка кажа, што накіраваў лісты ў шэраг праваахоўных установаў Польшчы з просьбай падаць адпаведную інфармацыю:

«На жаль, мы павінны канстатаваць, што праваахоўныя органы Польшчы даволі скупыя на інфармацыю пра тое, якія звесткі ім удалося атрымаць у межах расследавання, якое звязана са знікненнем Анжалікі Мельнікавай».

На запыт «Радыё Свабода» прэс-сакратар Міністэрства ўнутраных спраў і адміністрацыі Яцэк Дабжыньскі паведаміў, што яны не даюць ніякай інфармацыі пра знікненне спікеркі Каардынацыйнай рады.

Паводле Паўла Латушкі, які спасылаецца на польскую паліцыю, Анжаліка Мельнікава вылецела ў Лондан разам з дзецьмі:

«Анжаліка Мельнікава, калі планавала адпачынак, паінфармавала каманду, што збіраецца выехаць у Вялікабрытанію. Пазней, падчас маёй сустрэчы ў камендатуры сталічнай паліцыі ў Варшаве, мне пацвердзілі, што яна разам з непаўналетнімі дочкамі выехала ў Лондан».

У сацыяльных сетках Анжалікі Мельнікавай фота з Лондана датуюцца снежнем 2024 года.

Беларуская супольнасць ананімных хакераў «Кіберпартызаны» дагэтуль не мае доступу да фонду, якім кіравала Анжаліка Мельнікава і праз які ішлі грошы для іх у тым ліку, але працягвае займацца гэтай справай.

Афіцыйная прадстаўніца «Кіберпартызанаў» Юльяна Шаметавец адмовілася каментаваць «Радыё Свабода» сітуацыю, дадаўшы, што яны вядуць уласнае расследаванне, каб зразумець, што здарылася з Анжалікай Мельнікавай.

Пра знікненне спікеркі Каардынацыйнай рады Анжалікі Мельнікавай яе калегі паведамілі ўвечары 28 сакавіка. У заяве Паўла Латушкі гаварылася, што сувязь адсутнічае з 25 сакавіка, аднак гаворка ідзе пра анлайн-камунікацыю. Насамрэч Мельнікаву ўжывую не бачылі ўжо даўным-даўно. Пазней стала вядома, што Анжаліка Мельнікава пакінула тэрыторыю Еўрасаюза 26 лютага, а яе былы муж з'ехаў з Польшчы ў Беларусь 3 сакавіка.

Сёння журналістам «Люстэрка» ўдалося паразмаўляць з былым мужам Анжалікі Мельнікавай, які пацвердзіў, што знаходзіцца ў Беларусі, а дзеці — пры ім. Бацькі Мельнікавай у размове з журналістам «Еўрарадыё» таксама пацвердзілі, што дзеці знаходзяцца ў Беларусі, а пра месцазнаходжанне самой Анжалікі яны самі нічога не ведаюць і трывожацца.

• 1
• 1
• 6
• 7
• 1
• 6
• 0
• 0