Kalehi Anžaliki Mielnikavaj raskazali pra apošnija razmovy ź joj
Amal dva tydni niama nijakich źviestak pra śpikierku Kaardynacyjnaj rady Anžaliku Mielnikavu. «Radyjo Svaboda» znajšło kaleh Anžaliki, jakija razmaŭlali ź joj užo paśla taho, jak jaje telefon byŭ nibyta zafiksavany ŭ Biełarusi.
«Radyjo Svaboda» pahavaryła z kalehami Anžaliki Mielnikavaj, jakija razmaŭlali ź joj niezadoŭha da aficyjnaj zajavy pra jaje źniknieńnie.
Pavodle krynic «Svabody», Anžalika źbirała danyja dla składańnia kantraktaŭ pa supracoŭnictvie z Kaardynacyjnaj radaj — heta pašpartnyja źviestki, adras, numar bankaŭskaha rachunku. Razmovy adbyvalisia tady, kali, pavodle infarmacyi Paŭła Łatuški, telefon Anžaliki nibyta ŭžo fiksavali ŭ Biełarusi.
Narodnaje antykryzisnaje ŭpraŭleńnie Paŭła Łatuški samastojna vyznačyła, što mabilnaja pryłada Mielnikavaj była łakalizavanaja na terytoryi Biełarusi 19 i 25 sakavika. Pry hetym adzin ź jaje hadžetaŭ jašče 18 sakavika znachodziŭsia ŭ Varšavie.
«My razmaŭlali pa pracy. Razmova była samaja zvyčajnaja, jana była spakojnaja, žartavała. Absalutna ničoha nie pakazvała, što niešta zdaryłasia», — raskazaŭ «Svabodzie» adzin ź siabroŭ Kaardynacyjnaj rady.
Pavodle słoŭ vykanaŭcy abaviazkaŭ śpikierki Kaardynacyjnaj rady Stanisłavy Hlińnik, siabry arhanizacyi źviarnulisia ŭ polskaje MUS z prapanovaj dapamohi ŭ rasśledavańni, kali palicyi budzie patrebna ad ich infarmacyja:
«Na siońniašni dzień my sabrali dosyć poŭnuju karcinu, chto i kali kantaktavaŭ z Anžalikaj unutry Kaardynacyjnaj rady, ale heta nie dapamahaje zrazumieć, što adbyłosia».
Pavieł Łatuška kaža, što nakiravaŭ listy ŭ šerah pravaachoŭnych ustanovaŭ Polščy z prośbaj padać adpaviednuju infarmacyju:
«Na žal, my pavinny kanstatavać, što pravaachoŭnyja orhany Polščy davoli skupyja na infarmacyju pra toje, jakija źviestki im udałosia atrymać u miežach rasśledavańnia, jakoje źviazana sa źniknieńniem Anžaliki Mielnikavaj».
Na zapyt «Radyjo Svaboda» pres-sakratar Ministerstva ŭnutranych spraŭ i administracyi Jacek Dabžyński paviedamiŭ, što jany nie dajuć nijakaj infarmacyi pra źniknieńnie śpikierki Kaardynacyjnaj rady.
Pavodle Paŭła Łatuški, jaki spasyłajecca na polskuju palicyju, Anžalika Mielnikava vylecieła ŭ Łondan razam ź dziećmi:
«Anžalika Mielnikava, kali płanavała adpačynak, painfarmavała kamandu, što źbirajecca vyjechać u Vialikabrytaniju. Paźniej, padčas majoj sustrečy ŭ kamiendatury staličnaj palicyi ŭ Varšavie, mnie paćvierdzili, što jana razam ź niepaŭnaletnimi dočkami vyjechała ŭ Łondan».
U sacyjalnych sietkach Anžaliki Mielnikavaj fota z Łondana datujucca śniežniem 2024 hoda.
Biełaruskaja supolnaść ananimnych chakieraŭ «Kibierpartyzany» dahetul nie maje dostupu da fondu, jakim kiravała Anžalika Mielnikava i praź jaki išli hrošy dla ich u tym liku, ale praciahvaje zajmacca hetaj spravaj.
Aficyjnaja pradstaŭnica «Kibierpartyzanaŭ» Juljana Šamietaviec admoviłasia kamientavać «Radyjo Svaboda» situacyju, dadaŭšy, što jany viaduć ułasnaje rasśledavańnie, kab zrazumieć, što zdaryłasia z Anžalikaj Mielnikavaj.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
Siońnia žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
Maci Anžaliki Mielnikavaj: «Unukam kažu, što jana ŭ kamandziroŭcy»
«Dzieci sa mnoj». Žurnalisty dazvanilisia da byłoha muža Anžaliki Mielnikavaj i spytali, dzie moža być śpikierka KR
U suviazi sa źniknieńniem Mielnikavaj polskaja palicyja praviaraje pahrozy na adras Łatuški
Łatuška: Anžaliki Mielnikavaj niama ni ŭ Polščy, ni chutčej za ŭsio ŭ Biełarusi
U Kaardynacyjnaj radzie stvaryli pracoŭnuju hrupu pa pytańni źniknieńnia śpikierki Mielnikavaj
Da jakoj adčuvalnaj infarmacyi mieła dostup źnikłaja Anžalika Mielnikava?
Kamientary