Новая мікрахвалевая сістэма абясшкоджвае раі дронаў за секунды
Новая распрацоўка, перададзеная на выпрабаванні марской пяхоце ЗША, не выкарыстоўвае ракет ці гармат, а выводзіць з ладу электроніку беспілотнікаў з дапамогай магутнага электрамагнітнага выпраменьвання.
Як паведамляе Interesting Engineering, кампанія Epirus, якая спецыялізуецца на зброі накіраванай энергіі, паставіла першы доследны ўзор сістэмы ExDECS (Expeditionary Directed Energy Counter-Swarm — Экспедыцыйная сістэма накіраванай мікрахвалевай нейтралізацыі рою) у распараджэнне марской пяхоты ЗША.
ExDECS уяўляе сабой партатыўную высокамагутную мікрахвалевую зброю, якую можна ўсталёўваць на машыны або прычэпы. Яна выкарыстоўвае накіраванае выпраменьванне для падаўлення невялікіх дронаў 1-й і 2-й груп — гэта, як правіла, лёгкія апараты, што выкарыстоўваюцца для выведкі або атакі. У адрозненне ад класічных сродкаў супрацьпаветранай абароны, ExDECS нейтралізуе дроны не фізічна, а бескантактна, уздзейнічаючы на электроніку адразу цэлай групы.
Сістэма заснаваная на платформе Leonidas Expeditionary, таксама распрацаванай Epirus. Яе ключавая асаблівасць — магчымасць адначасовай нейтралізацыі мноства паветраных пагроз. Дзякуючы кампактнаму дызайну, ExDECS зручна выкарыстоўваць у палявых умовах, што асабліва важна для падраздзяленняў, якія дзейнічаюць у складанай або зменлівай абстаноўцы.
Унутраная архітэктура ExDECS пабудаваная на цвёрдацельных кампанентах, што робіць яе надзейнай і простай у абслугоўванні ў параўнанні са старымі вакуўмнымі тэхналогіямі.
Важны элемент канструкцыі — лёгказаменныя ўзмацняльныя модулі LRAM (Line Replaceable Amplifier Modules), якія забяспечваюць модульнасць сістэмы і даюць магчымасць хутка аднавіць яе працаздольнасць у выпадку няспраўнасці асобных кампанентаў.
Модулі LRAM не толькі заменныя, але і даюць магчымасць нарошчваць магутнасць сістэмы, адаптуючы яе пад канкрэтныя задачы — ад абароны аднаго аўтамабіля да стварэння поўнавартаснай стацыянарнай устаноўкі.
Сістэму таксама лёгка наладзіць пад канкрэтныя ўмовы. Яе параметры — частата, форма сігналу, магутнасць — могуць змяняцца праграмна, без замены апаратнага забеспячэння. Гэта робіць ExDECS гнуткім інструментам, які можна аператыўна адаптаваць да розных тыпаў пагроз.
ExDECS распрацаваная як частка намаганняў ЗША па стварэнні эканамічнай сістэмы абароны ад БПЛА. Адна з галоўных пераваг — адсутнасць боепрыпасаў і мінімальны кошт «стрэлу», бо сістэма выкарыстоўвае толькі электраэнергію. Гэта асабліва актуальна ў сітуацыях, калі танныя дроны масава атакуюць пазіцыі, а запасы ракет і снарадаў абмежаваныя.
Як падкрэсліваюць прадстаўнікі Epirus, новая тэхналогія дазваляе эфектыўна абараняцца ад беспілотнікаў ва ўмовах перагружанага радыёчастотнага спектру і хуткага змянення абстаноўкі. Паводле іх меркавання, такія сістэмы ў будучыні могуць заняць важнае месца ў складзе сучасных сіл супрацьпаветранай абароны — нароўні з радарамі, сродкамі радыёэлектроннай барацьбы і класічнымі перахопнікамі.
Каментары
Загаловак сфармуляваны так, што можна было падумаць, нібыта гэта ўжо перадалі Украіне...
Навошта нам наогул гэтая інфа. Луска нутавая, а не інфармацыя.