Рада міжнароднай арганізацыі грамадзянскай авіяцыі (ICAO) вырашыла, што збіваннем самалёта МН17 у ліпені 2014 года Расія парушыла Канвенцыю аб міжнароднай грамадзянскай авіяцыі. Пра гэта паведамляе «Еўрапейская праўда» са спасылкай на МЗС Нідэрландаў.
Спрэчку супраць Расіі ў ICAO ініцыіравалі Нідэрланды і Аўстралія ў сакавіку 2022 года. 12 мая гэтага года Рада міжнароднай арганізацыі грамадзянскай авіяцыі вызначыла, што адказнасць за збіванне рэйса МН17 ляжыць на Расіі.
Наступным крокам павінна стаць вызначэнне формы кампенсацыі з боку Расіі. Спачатку ІКАО павінна абавязаць краіну пачаць перамовы з Нідэрландамі і Аўстраліяй і садзейнічаць гэтаму працэсу.
Масква яшчэ летам 2024 года заявіла аб аднабаковым спыненні ўдзелу ў спрэчцы ў міжнароднай арганізацыі грамадзянскай авіяцыі.
У лютым 2025 года сваякі ахвяр трагедыі, у якой загінулі 298 чалавек, патрабавалі прызнання Расіяй адказнасці як частку мірнай дамовы з Украінай.
Акруговы суд Гаагі 17 лістапада 2022 года завочна прысудзіў да пажыццёвага зняволення Ігара Гіркіна, Сяргея Дубінскага і Леаніда Харчанку за іх ролю ў збіванні малайзійскага лайнера MH17 над Данбасам і даручыў забяспечыць іх арышт.
Суд пастанавіў, што яны павінны выплаціць сваякам загінулых больш за 16 млн еўра кампенсацый. Расія адмовілася выдаць трох датычных да збівання самалёта.
Каментары