Маладых мазырскіх скінхэдаў з «Духа Русі» будуць судзіць за «прапаганду тэрарызму»
Следчы камітэт паведаміў пра затрыманне васьмі маладых людзей з Мазыра і іншых рэгіёнаў. Усяго распачатыя 34 крымінальныя справы.
Па версіі следства, маладыя людзі з аб'яднанняў «Перт» і «Дух Русі» збіраліся ў падвале, дзе абмяркоўвалі акцыі і «захоўвалі прылады злачынстваў». Раней супольнасці прызналі «экстрэмісцкімі фарміраваннямі».
Сілавікі зацікавіліся дзейнасцю падлеткаў пасля таго, як супраць жыхара Ельскага раёна распачалі крымінальную справу аб распальванні варожасці (артыкул 130 КК) за паведамленні ў тэлеграме. Тады праверылі яго кантакты — хлопец актыўнічаў у суполцы «скінхэдаў» і часта ездзіў у Мазыр.
Па скрыншотах, якія апублікаваў СК, бачна, што хлопцы планавалі стварыць сетку аб'яднанняў па Беларусі, Расіі і Украіне.
«Аснова задумы — акцыі прамога дзеяння, якія павінны паўплываць на стан устойлівасці ўлады», — сказана на адным з паведамленняў.
Па іншых паведамленнях бачна, як у новага прыхільніка пытаюцца, ці гатовы ён «дзейнічаць радыкальна». Той адказвае, што «учора хадзіў каля РАУС, там складана акцыяніраваць».
СК піша, што ў Мазыры маладыя людзі ладзілі напады па прычыне нацыянальнай ці сацыяльнай варожасць. Аб чым канкрэтна гэта было, не ўдакладняецца. Сказана, што хлопцы выкарыстоўвалі маскі, драўляныя біты і пярцовыя балончыкі. Відэа, якія яны здымалі падчас нападаў, па меркаванні следства, сталі асновай для «экстрэмісцкага кантэнту», які публікаваўся на «падкантрольных рэсурсах».
Падлеткі стваралі тэлеграм-каналы, групы і боты, праз якія «папулярызавалі ідэі нацызму і рэабілітавалі нацысцкіх злачынцаў, распальвалі міжнацыянальную і сацыяльную варожасць, дыскрэдытавалі Беларусь і прапагандавалі тэрарыстычную дзейнасць».
Кандыдатам, якія хацелі далучыцца да маладзёнаў, даручалі вырабляць і распаўсюджваць «экстрэмісцкія ўлёткі» і маляваць «экстрэмісцкую сімволіку» на будынках. Для ўступлення ў аб'яднання праводзіліся абрады прысвячэння.
Дзейнасць падлеткаў следчыя расследавалі каля года. Усяго распачатыя 34 крымінальныя справы. Сілавікі затрымалі восем чалавек, сямёра з іх на момант падзей былі непаўналетнія.
Цяпер іх абвінавачваюць у хуліганстве, рэабілітацыі нацызму, стварэнні «экстрэмісцкіх фарміраванняў», прапагандзе тэрарызму і іншым артыкулам КК.
Цяпер чытаюць
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары