Пры паездцы з Беларусі ў Польшчу на мяжы чакаць толькі 6 гадзін, а назад — суткі
Сітуацыя на беларуска-польскай мяжы перавярнулася з ног на галаву: раней выезду ў суседнюю краіну чакалі суткамі — а цяпер толькі 5 гадзін. Затое агромністыя чэргі выстраіліся на ўезд у Беларусь, піша «Белсат».
Паводле звестак Дзяржаўнага памежнага камітэта на 18:00, у Брэсце выезду ў Польшчу чакаюць 260 легкавікоў. Проста цяпер у пункт пропуску выклікаюць тых, хто зарэгістраваўся 6 гадзін таму. Сёння а 8:00 чаргі зусім не было.
«Я сёння, як паглядзеў, — афігеў, што чарга сышла», — прызнаюцца ў Telegram-чатах.
Іншыя, зрэшты, упэўненыя, што такая вольніца ў Брэсце хутка скончыцца:
«Пару дзён — і зноў чарга РБ-РП на некалькі дзён будзе».
Яшчэ на мінулым тыдні падарожнікам даводзілася траціць і 5 сутак, у чарзе было 2300 аўтаў.
У іншай чарзе — 18 аўтобусаў. У справаздачах у тэлеграм-чатах падарожнікі пішуць, што нават з перасадкамі ў аўтобусы, бліжэйшыя да шлагбауму, чакаць даводзіцца не менш за 12 гадзін.
Аўтобус Ecolines, які меў прыехаць сёння з Мінску ў Варшаву ў 00:15, прыбыў у 9:40, а той, што чакаўся у 5:20, прыехаў у 15:40.
Пры гэтым у Тарэспалі цяпер — зусім цяжка. У чарзе каля 420 легкавых аўто. У чатах сведчаць, што даводзіцца чакаць мінімум суткі. Электроннай чаргі няма, праз гэта існуе пагроза «ўлезуноў». Падарожнікі складаюць спісы, сочаць, каб ніхто не ўціснуўся, уначы будзяць адзін аднаго, каб чарга рухалася і ў ёй не з'яўляліся дзіркі.
«Дзякуй паліцыянтам, якія сёння дзяжураць і хоць крыху прасоўваюць чаргу. Ужо некага штрафавалі», — пішуць у чатах.
Падарожнікі наракаюць на беларускіх мытнікаў, якія пільна спраўджваюць усе рэчы:
«Заехалі ў чаргу ў 3:00 12.07.2025, а заехалі ў Беларусь а 5:00 13.07.2025. Агулам — 26 гадзін катаргі, проста жэсць. Беларусы — і рэнтген, і сабака, і ўсе рэчы ператрэслі».
Аўтобусаў у Тарэспалі ў бок Беларусі цяпер 30. Тут таксама перасаджваюцца бліжэй да шлагбаума. І нават у такім выпадку — мінімальна 8 гадзін чакання.
Аўтобусы моцна спазняюцца: сёння ў 14:35 у Мінск з Варшавы прыехаў аўтобус, што меўся прыбыць яшчэ ўчора ў 20:15; у 5:40 прыехаў аўтобус, які паводле раскладу мусіў быць учора ў 11:00.
Каментары