У Расіі перастаў працаваць адзіны партал дзяржаўных паслуг «Дзяржпаслугі». Паводле сэрвісу Downdetector, найбольш скаргаў паступае з Масквы, Санкт-Пецярбурга, а таксама з розных рэгіёнаў, у тым ліку Ямала-Ненецкай аўтаномнай акругі і Свердлоўскай вобласці, піша The Moscow Times.
Людзі скардзяцца на немагчымасць зайсці на сайт, памылкі пры загрузцы і недаступнасць асабістага кабінета. Перабоі закранулі як вэб-версію, так і мабільны дадатак. Тэрміны аднаўлення працы пакуль невядомыя.
Збой адбыўся неўзабаве пасля хакерскай атакі на IT-сістэмы авіякампаніі «Аэрофлот». З-за ўмяшання хакераў амаль сотня рэйсаў была скасаваная, што прывяло да калапсу ў маскоўскім аэрапорце «Шарамеццева».
Адказнасць за атаку ўзялі на сябе групоўкі Silent Crow і «Кіберпартызаны». Яны заяўляюць, што атрымалі доступ да ўсіх карпаратыўных сістэм, уключаючы дакументы, запісы і камп’ютары супрацоўнікаў. Паводле іх слоў, пранікненне стала магчымым, сярод іншага, праз тое, што кіраўнік «Аэрофлота» не мяняў пароль з 2022 года, а кампанія выкарыстоўвала састарэлыя сістэмы Windows XP і Windows 2003.
Генпракуратура Расіі пацвердзіла факт узлому і распачала крымінальную справу адносна неправамернага доступу да камп’ютарнай інфармацыі. Раскамнагляд пакуль не пацвярджае, што асабістыя даныя кліентаў і супрацоўнікаў сапраўды скампраметаваныя.
Каментары
у ардзе пакуль не панікуюць
шпана