Siłaviki apublikavali raparty, jakija im pisała palitźniavolenaja Kanavałava. Ale jana pryznavałasia ŭ supracy jašče raniej

Pieršaja z papier, jakija pakazali siłaviki — heta zajava, napisanaja ad imia Antaniny Kanavałavaj. U tym tekście jana pahadžajecca dobraachvotna sadziejničać u pradastaŭleńni značnaj infarmacyi. Na fota zamazanyja słovy, jakija śviedčać pra toje, kamu ž Antanina sabrałasia sadziejničać. Situacyja ž adbyvałasia ŭ žanočaj kałonii ŭ Homieli.

Siłaviki taksama vykłali fotazdymki arkušaŭ papiery z rukapisnym tekstam, jaki, mierkavana, napisała taksama Kanavałava. Tam zhadvajucca imiony inšych palitviaźniaŭ — Iryny Ščasnaj, Haliny Dzierbyš, Natalli Dulinaj, Safii Sapiehi. U rapartach niama infarmacyi, jakaja musiła b pryvieści da dadatkovaha pakarańnia taho ci inšaha čałavieka. Heta apisalnyja źviestki pra toje, chto što kazaŭ i jak reahavaŭ na tyja ci inšyja padziei. Dakumient daje ŭjaŭleńnie pra toje, što cikavić administracyju kałonii, jakija spravazdačy apieratyŭniki chočuć mieć ad svaich infarmataraŭ.

Davieranaja asoba Śviatłany Cichanoŭskaj Antanina Kanavałava była zatrymanaja 6 vieraśnia 2020 hoda. Joj prysudzili piać z pałovaj hadoŭ kałonii za «masavyja biesparadki». Paśla byŭ aryštavany i jaje muž Siarhiej Jaraševič. Dzieci Antaniny zastalisia z babulaj. Antanina Kanavałava vyjšła pa pamiłavańni 10 śniežnia 2024 hoda, paśla čaho źjechała za miažu.

Užo ŭ emihracyi Kanavałava pryznałasia, što za kratami joj daviałosia pahadzicca na supracoŭnictva z administracyjaj kałonii.

Paśla vyzvaleńnia, kali Antanina jašče znachodziłasia ŭ Biełarusi, jaje, jak ličyć žančyna, raspracoŭvali ŭ metach dalejšaha supracoŭnictva. Kanavałavu vyklikali ŭ HUBAZiK:

«Jany mnie zadavali pytańni: «Ci pamianiali vy svaje pohlady?» Viadoma, ja im kazała, što pamianiała pohlady, mnie treba było zrabić usio, kab jany mnie pavieryli. Ja im kazała, što maje dzieci viernucca ŭ Biełaruś, chacia ja ŭžo viedała, što jany nie viernucca».

Paźniej žančynu vyklikali na «razmovy» jašče čatyry razy. Antaninu raspytvali pra toje, jak spravy ŭ kałonii pad kiraŭnictvam novaha načalnika, prapanoŭvali znajści joj pracu i pryvieźci dziaciej u Biełaruś. Pavodle słoŭ Antaniny, kali siłaviki pabačyli, što ŭ jaje niama žadańnia supracoŭničać, jany pačali pahražać joj novaj kryminałkaj.

Na siońniašniuju publikacyju siłavikoŭ žančyna adreahavała ŭ svaim fejsbuku. Jana napisała, što ŭ toj zajavie pahadžałasia supracoŭničać mienavita z administracyjaj kałonii, i hetyja słovy siłaviki byccam zamazali na fota. Ciapier ža, piša Antanina, u jaje atačeńni jość ludzi, jakija pieradajuć siłavikam infarmacyju pra jaje pierasoŭvańni.

Kanavałava abiacaje naviny pa svajoj spravie:

«U bližejšy čas adbuducca niezaležnyja pravierki na palihrafie, da jakich ja ŭžo rychtujusia. Astatniaje skažuć fakty. Tak što čakajcie, supracoŭniki, dla vas u mianie budzie asabisty padarunak».

Jana nie stała tłumačyć, čamu i ź jakoj nahody vyrašyła pajści na palihraf.

Byłaja palitźniavolenaja Iryna Ščasnaja, pra jakuju Kanavałava raskazvała ŭ adnym sa svaich rapartaŭ, vykazałasia ŭ jaje padtrymku: 

«Padtrymaju Toniu kožnym słovam i kožnaj dumkaj. Heta mienavita toj čałaviek, u čyim sumleńni ja ŭpeŭnienaja na 100 adsotkaŭ, bo ź jaje padtrymkaj i dapamohaj ja ŭsio ž prajšła samyja strašnyja časy ŭ katavalni №4. Dziakuj tabie, daražeńkaja. My razam!»

• 6
• 0
• 4
• 3
• 4
• 1
• 4
• 6