Найбуйнейшы гастрамол і сучасны паркінг: што яшчэ з'явіцца побач з Камароўскім рынкам у Мінску
Сяміпавярховы паркінг і найбуйнейшы ў краіне гастрамол. Якім стане квартал у межах вуліц Кульман — Якуба Коласа — Веры Харужай, дзе раней размяшчаўся завод вылічальнай тэхнікі, — у матэрыяле Мінск-Навінаў.
Ад станкоў да офісаў
Пасля пераезду завода на іншую пляцоўку ў цэнтры горада засталіся пуставаць вытворчыя карпусы і адміністрацыйныя будынкі. Рэканструкцыяй гістарычных памяшканняў занялася група кампаній «ТАПАС». Забудоўшчык трансфармуе былыя цэхі ў прасторы, захоўваючы прамысловую ідэнтычнасць месца.
Зараз тут ўзводзяць шматфункцыянальны комплекс «Атмасфера». Ужо адкрыты першыя аб’екты — бізнэс-цэнтры. Над астатнімі зонамі працуюць будаўнікі. З цягам часу тут запрацуюць гандлёвыя пляцоўкі, гастрамол, дзіцячы забаўляльны цэнтр і экарынак.
Перш чым прыступіць да стварэння сучаснага комплексу, спецыялісты старанна абследавалі кожны будынак, каб ацаніць агульны стан канструкцый. Састарэлыя і зношаныя элементы давялося дэмантаваць — знесены старыя перагародкі, дахі і інжынерныя сістэмы. Нясучыя канструкцыі ўмацавалі.
— Мы сутыкнуліся з цяжкай задачай — адаптаваць прамысловыя будынкі да сучасных стандартаў, не парушыўшы іх першапачатковы выгляд. У працэсе работ улічвалі асаблівасці старой забудовы, што запатрабавала індывідуальных інжынерных рашэнняў для кожнай часткі аб’екта, — распавёў спецыяліст кампаніі-забудоўшчыка.
Вытворчыя памяшканні адрозніваюцца высокімі столямі, адкрытымі прасторамі, калонамі замест перагародак і вялікімі вокнамі, якія прапускаюць шмат натуральнага святла. Гэтыя асаблівасці захавалі. Будучыя арандатары змогуць самастойна падзяліць прастору пад свае патрэбы.
— Архітэктурная канцэпцыя праекта спалучае сучасны падыход з акцэнтам на адкрытасць. Шкляныя фасады забяспечваюць высокую натуральную асветленасць унутраных памяшканняў, падкрэсліваюць маштаб і дынаміку аб’екта, а таксама гарманічна ўпісваюцца ў гарадскі ландшафт цэнтра Мінска. Пры гэтым у некалькіх будынках захаваны асобныя канструктыўныя элементы былой забудовы, — адзначыў прадстаўнік кампаніі-забудоўшчыка.
На сёння завершаны тры карпусы бізнес-цэнтра IT max, размешчаныя ўздоўж вуліц Я. Коласа і Кульман, а таксама 9-павярховая частка шматфункцыянальнага цэнтра Delphi — яна бліжэй да Камароўскага рынку.
— Каб падтрымаць архітэктурны выгляд суседніх будынкаў, у афармленні фасадаў нізкапавярховай забудовы выкарысталі дэкаратыўную тынкоўку з імітацыяй цаглянай муроўкі і вентыляваныя фасадныя сістэмы. А вось Delphi вырашылі зашкліць, каб надаць візуальную лёгкасць, — тлумачыць спецыяліст.
Кардынальна змяняць планіроўку забудоўшчык не стаў — невялікія па памеры памяшканні вырашылі пакінуць для малога бізнесу.
Таксама офісы з’явяцца ў будынку былога ГЦ «Пасаж». Акрамя іх, на першым паверсе размесцяць гандлёвыя кропкі, гіпермаркет, фуд-корт і трэнажорную залу.
Гастрамол «Маніфест»
Яго ствараюць на месцы, дзе раней размяшчаліся папулярная стрытфуд-пляцоўка і фермерскі рынак. Паводле праекта, тут плануюць стварыць чатыры поўнафарматныя рэстараны і 34 рэстаранныя корнеры агульнай колькасцю больш як на 1 000 пасадачных месцаў.
Таксама на візуалізацыях відаць сучасныя кропкі грамадскага харчавання і палюбіліся многім фудтракі — яны стаяць уздоўж захаванага сквера. Забудоўшчык абяцае, што гэта будзе найбуйнейшы гастрамол у краіне: агульная плошча — звыш 10 тыс. кв. м.
Сучасны паркінг
Сяміпавярховы паркінг на 568 машынамесцаў узводзяць у цэнтры квартала, побач з гастрамолам. Фасад плануюць аформіць вертыкальнымі драўлянымі ламелямі, але пакуль на будаўнічай пляцоўцы відаць толькі бетонныя сцены.
У гэтым жа будынку на першым паверсе размесцяць аўтамыйку і сямейны цэнтр «Галактыка», дзе бацькі змогуць пакінуць дзіця, ідучы па пакупкі.
Тут з’явяцца пакоі для адпачынку. Цэнтр зойме больш за 7 тыс. кв. м, уваход будзе як з вуліцы, так і з паркінга. На тэрыторыі комплексу абсталююць некалькі наземных парковак на 784 аўтамабілі.
Каб забяспечыць зручнасць перамяшчэння, арганізавана некалькі варыянтаў заезду. Адзін з іх — з боку вул. Я. Коласа.
— Асаблівая ўвага надаецца добраўпарадкаванню прылеглай тэрыторыі і арганізацыі транспартнай лагістыкі. Кожная зона атрымае зручныя ўваходы і выхады, інтэграваныя ў існуючыя пешаходныя патокі горада. Запланавана азеляненне з выкарыстаннем вертыкальнага і дэкаратыўнага ландшафтнага дызайну, які арганічна ўпішуцца ў архітэктуру будынкаў і грамадскіх месцаў.
Навакольная прастора стане зручнай для прагулак і адпачынку пад адкрытым небам, — падкрэсліў прадстаўнік кампаніі-забудоўшчыка. Агульная плошча будучага комплексу — больш за 80 тыс. кв. м.
Каментары
Ці належаў раней, бо яго там пасадзілі, трапіў ў няміласць, а ці ўжо выпусцілі, ці не, што далей было ўжо ня ведаю.