У буйных расійскіх гарадах сталі правяраць электронныя прылады пры ўваходзе ў метро
У метрапалітэнах расійскіх гарадоў-мільённікаў пачалі абавязкова правяраць працу электронных прылад падчас агляду пасажыраў. Новыя правілы ўжо дзейнічаюць у Екацярынбургу і Санкт-Пецярбургу: патрабуецца ўключаць тэлефоны, камп’ютары і іншыя прыборы, каб пацвердзіць іх спраўнасць. Пры гэтым змесціва прылад пакуль не правяраецца, піша The Moscow Times.
Паводле паведамлення прэс-службы Екацярынбургскага метрапалітэна, мэта новаўвядзення — павышэнне антытэрарыстычнай бяспекі, бо прылады могуць быць выкарыстаныя ў якасці выбуховага прыбора або для пераносу забароненых рэчываў.
У сацыяльных сетках жыхары Екацярынбурга ўжо скардзяцца на новыя правілы. Яны адзначаюць праблему: калі тэлефон разрадзіўся, чалавек не можа скарыстацца метро, выклікаць таксі ці папрасіць сваякоў забраць яго. Калі ж папрасіць патэлефанаваць з чужога тэлефона, гэта можа разглядацца як парушэнне закона.
Падобныя меры ўвялі ў метрапалітэне Санкт-Пецярбурга яшчэ ў жніўні. Там таксама патрабуецца ўключаць электронныя прылады для праверкі, але мясцовае заканадаўства забараняе выкарыстоўваць разеткі для падзарадкі без асаблівага дазволу, што ўскладняе жыццё пасажырам з разраджанымі прыладамі.
Падстава для ўвядзення новых правіл — загад расійскага Міністэрства транспарту № 34 ад 4 лютага 2025 года, які абавязвае правяраць тэхніку не толькі сканерамі, але і праз абавязковае ўключэнне. Раней гэта было толькі магчымасцю, цяпер — абавязак. Падобныя меры ўжо даўно дзейнічаюць у аэрапортах Расіі па Паветраным кодэксе РФ.
Цяпер чытаюць
«Пераапрануўся ў амапаўца і дырыжыраваў чорнай дубінкай». Адзін з заснавальнікаў «Вольнага хору» — пра акцыі ў гандлёвых цэнтрах у 2020‑м і працу ў філармоніі ў Літве
Каментары