Літва не будзе кампенсаваць страты перавозчыкаў, якія захраслі ў Беларусі
«Гэта не мы іх трымалі, іх трымаў беларускі рэжым».
Міністр транспарту Літвы Юрас Тамінскас заявіў, што ўрад не будзе кампенсаваць страты перавозчыкаў, якія захраслі на мяжы з Беларуссю, піша LRT.
Юрас Тамінскас заявіў, што ўрад не мае намеру пакрываць страты перавозчыкаў, звязаныя з часовым закрыццём памежных пунктаў з Беларуссю, — «нават дыскусіі такой няма».
На яго думку, папярэджанні ўладаў аб рызыках не перашкаджаюць гэтаму бізнэсу працягваць дзейнасць на ўсходнім кірунку.
«Відавочна, што яны ўсё роўна ехалі, ездзяць і будуць ездзіць — гэта не зменіць іх меркаванне і іх паводзіны. Калі яны публічна заяўляюць, што працягваюць працаваць ва ўсходнім напрамку, то чаму тады трэба патрабаваць ад дзяржавы пакрываць панесеныя страты?» — сказаў Тамінскас.
Міністр падкрэсліў, што пытанне аб кампенсацыі страт не разглядаецца. «Гэта не мы іх трымалі, іх трымаў беларускі рэжым», — заявіў Тамінскас.
Па словах Тамінскаса, пра гібрыдную атаку Мінска супраць Літвы паведамлялі яшчэ за тыдзень да закрыцця мяжы, таму бізнэс мусіў ацаніць рызыку таго, што «едзе да дзяржавы-агрэсара».
Сёння Літва адкрыла мяжу з Беларуссю, закрытую ў канцы кастрычніка ў адказ на гібрыдныя атакі ў боку Беларусі.
Каментары