Жасмін з Адэсы вырашыла стварыць у Беларусі брэнд галаўных убораў для мусульманак. І атрымала хвалю нянавісці
Пра сваю ідэю Жасмін Такха распавяла ў Threads. Дзяўчына-мусульманка напісала, што тры месяцы таму пераехала з Адэсы ў Мінск і цяпер плануе развіваць свой бізнэс. Жасмін цікавіцца модай, таму хоча стварыць у Беларусі брэнд галаўных убораў для мусульманак. Скончыла допіс яна фразай: «Усім асалям алейкум». І пачалося.
Допіс сабраў ужо пад дзве тысячы каментароў. І многія з іх агрэсіўныя. Часцей за ўсё дзяўчыне ў грубай форме раілі ехаць у мусульманскія краіны — у першую чаргу ў Афганістан.
«Прывозячы да нас галаўныя ўборы для мусульман, не забывайце, што Беларусь — гэта радзіма яўрэяў», — напісала адна з каментатарак і набрала 2400 лайкаў.
«І да РБ дабраліся са сваімі анучамі, але тут гэтая гісторыя не пройдзе, тут цывілізаванае сучаснае грамадства», — абурылася іншая і атрымала 1300 лайкаў у падтрымку свайго меркавання.
У каментарах нагадвалі таксама, што татары, якія таксама мусульмане, ў Беларусі выглядалі інакш.
Яшчэ адна жанчына адзначыла, што «можа, Беларусь і гасцінная, але не сляпая, і цудоўна бачыць, што робяць мусульмане ў ЕС», — з ёй пагадзілася 1200 чалавек.
Іншая патрабуе не чапаць Беларусі: «У нас праваслаўныя і каталікі. Але гэта людзі, якія больш за адэкватныя. Больш за тое, мы не губляем здаровага сэнсу і жывём з Богам у душы, а не напаказ. Я першая выйду супраць вас! Я карэнная беларуска і маё права не аддаваць вам сваю краіну! Марш у ісламскія краіны!»
«Скажыце потым адрас крамы, паспрабую побач з вамі адкрыць лаўку са свінінай на паліцах».
«Чамадан, вакзал, Афганістан».
Некаторыя не стрымліваліся ў выразах і называлі жанчын у хіджабах «заматашкамі».
У каментары прыйшла нават беларуская дызайнерка Вольга Новік, стваральніца брэнду Ton-in-ton: «Мы не мусульманская краіна. Не трэба тут мусульманства насаджаць. Хочаце быць дызайнеркай, хочаце быць беларускай — мы не супраць. Мы рады ўсім, незалежна ад этнічнага паходжання. Беларусы талерантныя. Аднак паважайце і развівайце нашу культуру, нашы традыцыі і наш фэшн як беларускі фэшн».
Але многія абаранялі дзяўчыну ў каментарах і пісалі, што ў шоку ад такой неталерантнасці беларусаў.
«А кажуць, беларусы добрая нацыя, чытаю каменты і ў шоку ад агрэсіі, — напісала адна з жанчын. — Я беларуска. Я супраць расавай і нацыянальнай варажнечы.
У кожнага з нас ёсць свае страхі і межы, я таксама не заўсёды адчуваю сябе спакойна побач з мужчынамі з некаторых культур. Але гэта не нагода выліваць усю гэтую трывогу на канкрэтную дзяўчыну. Яна нікому не навязвае сваю культуру, проста спрабуе працаваць. Яе бізнэс, магчыма, не стане папулярным у нас, і гэта нармальна. Ненармальна тое, што адбываецца ў каментарах».
Сама ж Жасмін спрабуе не губляць аптымізму. Яна напісала, што ўсё думала, як прыцягнуць увагу новых падпісчыкаў, мусульманак Беларусі — прыдумвала сцэнарыі для рылсаў, як лепш зняць, дзе святло паставіць…
Але адзін допіс у Threads дапамог ёй стаць мінскай знакамітасцю.
Каментары
[Зрэдагавана]
Мабыць гэта таксама хайпуе ? Адэса спецыфічнае места