«Дзень, якога многія чакалі». Заснавальнік EPAM адрэагаваў на вызваленне 123‑х палітвязняў
«Сёння быў дзень, якога многія чакалі. Глыбокая ўдзячнасць Крыстаферу У. Сміту за намаганні, настойлівасць і разважлівасць, якая стаіць за гэтым. Дзякуй», — напісаў заснавальнік EPAM Аркадзь Добкін у сацыяльнай сетцы LinkedIn пасля таго, як 13 снежня стала вядома пра вызваленне з беларускіх калоній 123 палітвязняў. На ягоны допіс звярнуў увагу Devby.io.
Крыстафер У. Сміт, якому падзякаваў Добкін, — намеснік памочніка дзяржсакратара ЗША ва Усходняй Еўропе, а таксама ў пытаннях палітыкі і рэгіянальных спраў у Бюро па справах Еўропы і Еўразіі.
Да свайго допісу Добкін прыклаў спасылку на старонку сайта Дзярждэпартамента ЗША, якая прэзентуе Крыстафера У. Сміта.
У суботу 13 снежня адбыўся новы і на сёння самы маштабны этап вызвалення беларускіх палітвязняў — пасля візіту ў Мінск дэлегацыі ЗША на чале са спецпрадстаўніком Джонам Коўлам і абвяшчэнне аб зняцці амерыканскіх санкцый з беларускага калію. З турмы выйшлі 123 чалавекі — Віктар Бабарыка, Марыя Калеснікава, Алесь Бяляцкі, Максім Знак, Марына Золатава і многія іншыя знакавыя фігуры.
Сярод вызваленых былі як мінімум чатыры беларускія айцішнікі:
- 39‑гадовы праграміст Аляксандр Яшкін з Гродна. У пачатку 2024 года Гродзенскі абласны суд прысудзіў яго да 4 гадоў калоніі агульнага рэжыму паводле абвінавачвання за данаты, заклікі да захопу ўлады і г. д.
- 49‑гадовая праграмістка Наталля Давыдка, выпускніца Мінскага радыётэхнічнага інстытута, была затрыманая ў студзені 2024 года, абвінавачаная ў спрыянні экстрэмісцкай дзейнасці ды інш., прысуджаная да пазбаўлення волі ў калоніі агульнага рэжыму.
- 34‑гадовая праграмістка Настасся Жыльская. Працавала ў Exadel, была затрыманая ў верасні 2024 года, абвінавачаная ў закліках да санкцый, распальванні варожасці ды інш. Паводле артыкулаў абвінавачвання магла быць асуджаная на тэрмін ад 4 да 12 гадоў.
- 37‑гадовы айцішнік Віктар Мека. Ствараў кастамныя гульні і моды для Dota 2. Быў затрыманы ў лютым 2025 года, паводле артыкула аб закліках да дзеянняў супраць нацыянальнай бяспекі асуджаны на 2 гады калоніі агульнага рэжыму.
Акрамя таго вядома, што ў спісе вызваленых чатыры супрацоўнікі прадпрыемства «Пеленг»: Карына Праташчык, Ірына Суржык, Вадзім Жукоўскі і Сяргей Зеляноўскі.
Каментары
а ты чаго чакаў ? Маскоўскія танкі і акупацыю Менска? навіна сапраўды ФАНТАСТЫЧНАЯ, рухаемся да нацыянальнага дыялога.